ந ப்ரதா⁴நமசேதநமாத்மஶப்³தா³லம்ப³நம் ப⁴விதுமர்ஹதி । ‘ஸ ஆத்மா’ இதி ப்ரக்ருதம் ஸத³ணிமாநமாதா³ய, ‘தத்த்வமஸி ஶ்வேதகேதோ’ இதி சேதநஸ்ய ஶ்வேதகேதோர்மோக்ஷயிதவ்யஸ்ய தந்நிஷ்டா²முபதி³ஶ்ய, ‘ஆசார்யவாந்புருஷோ வேத³ தஸ்ய தாவதே³வ சிரம் யாவந்ந விமோக்ஷ்யே(அ)த² ஸம்பத்ஸ்யே’ (சா². உ. 6 । 14 । 2) இதி மோக்ஷோபதே³ஶாத் । யதி³ ஹ்யசேதநம் ப்ரதா⁴நம் ஸச்ச²ப்³த³வாச்யம் ‘தத் அஸி’ இதி க்³ராஹயேத் முமுக்ஷும் சேதநம் ஸந்தமசேதநோ(அ)ஸீதி, ததா³ விபரீதவாதி³ ஶாஸ்த்ரம் புருஷஸ்யாநர்தா²யேத்யப்ரமாணம் ஸ்யாத் । ந து நிர்தோ³ஷம் ஶாஸ்த்ரமப்ரமாணம் கல்பயிதும் யுக்தம் । யதி³ சாஜ்ஞஸ்ய ஸதோ முமுக்ஷோரசேதநமநாத்மாநமாத்மேத்யுபதி³ஶேத்ப்ரமாணபூ⁴தம் ஶாஸ்த்ரம் , ஸ ஶ்ரத்³த³தா⁴நதயா அந்த⁴கோ³லாங்கூ³லந்யாயேந ததா³த்மத்³ருஷ்டிம் ந பரித்யஜேத் , தத்³வ்யதிரிக்தம் சாத்மாநம் ந ப்ரதிபத்³யேத । ததா² ஸதி புருஷார்தா²த்³விஹந்யேத, அநர்த²ம் ச ருச்சே²த் । தஸ்மாத்³யதா² ஸ்வர்கா³த்³யர்தி²நோ(அ)க்³நிஹோத்ராதி³ஸாத⁴நம் யதா²பூ⁴தமுபதி³ஶதி, ததா² முமுக்ஷோரபி ‘ஸ ஆத்மா தத்த்வமஸி ஶ்வேதகேதோ’ இதி யதா²பூ⁴தமேவாத்மாநமுபதி³ஶதீதி யுக்தம் । ஏவம் ச ஸதி தப்தபரஶுக்³ரஹணமோக்ஷத்³ருஷ்டாந்தேந ஸத்யாபி⁴ஸந்த⁴ஸ்ய மோக்ஷோபதே³ஶ உபபத்³யதே । அந்யதா² ஹ்யமுக்²யே ஸதா³த்மதத்த்வோபதே³ஶே, ‘அஹமுக்த²மஸ்மீதி வித்³யாத்’ (ஐ. ஆ. 2 । 1 । 2 । 6) இதிவத்ஸம்பந்மாத்ரமித³மநித்யப²லம் ஸ்யாத் । தத்ர மோக்ஷோபதே³ஶோ நோபபத்³யேத । தஸ்மாந்ந ஸத³ணிமந்யாத்மஶப்³த³ஸ்ய கௌ³ணத்வம் । ப்⁴ருத்யே து ஸ்வாமிப்⁴ருத்யபே⁴த³ஸ்ய ப்ரத்யக்ஷத்வாது³பபந்நோ கௌ³ண ஆத்மஶப்³த³: ‘மமாத்மா ப⁴த்³ரஸேந:’ இதி । அபி ச க்வசித்³கௌ³ண: ஶப்³தோ³ த்³ருஷ்ட இதி நைதாவதா ஶப்³த³ப்ரமாணகே(அ)ர்தே² கௌ³ணீகல்பநா ந்யாய்யா, ஸர்வத்ராநாஶ்வாஸப்ரஸங்கா³த் । யத்தூக்தம் சேதநாசேதநயோ: ஸாதா⁴ரண ஆத்மஶப்³த³:, க்ரதுஜ்வலநயோரிவ ஜ்யோதி:ஶப்³த³ இதி, தந்ந । அநேகார்த²த்வஸ்யாந்யாய்யத்வாத் । தஸ்மாச்சேதநவிஷய ஏவ முக்²ய ஆத்மஶப்³த³ஶ்சேதநத்வோபசாராத்³பூ⁴தாதி³ஷு ப்ரயுஜ்யதே — ‘பூ⁴தாத்மா’ ‘இந்த்³ரியாத்மா’ இதி ச । ஸாதா⁴ரணத்வே(அ)ப்யாத்மஶப்³த³ஸ்ய ந ப்ரகரணமுபபத³ம் வா கிஞ்சிந்நிஶ்சாயகமந்தரேணாந்யதரவ்ருத்திதா நிர்தா⁴ரயிதும் ஶக்யதே । ந சாத்ராசேதநஸ்ய நிஶ்சாயகம் கிஞ்சித்காரணமஸ்தி । ப்ரக்ருதம் து ஸதீ³க்ஷித்ரு, ஸந்நிஹிதஶ்ச சேதந: ஶ்வேதகேது: । ந ஹி சேதநஸ்ய ஶ்வேதகேதோரசேதந ஆத்மா ஸம்ப⁴வதீத்யவோசாம । தஸ்மாச்சேதநவிஷய இஹாத்மஶப்³த³ இதி நிஶ்சீயதே । ஜ்யோதி:ஶப்³தோ³(அ)பி லௌகிகேந ப்ரயோகே³ண ஜ்வலந ஏவ ரூட⁴:, அர்த²வாத³கல்பிதேந து ஜ்வலநஸாத்³ருஶ்யேந க்ரதௌ ப்ரவ்ருத்த இத்யத்³ருஷ்டாந்த: । அத²வா பூர்வஸூத்ர ஏவாத்மஶப்³த³ம் நிரஸ்தஸமஸ்தகௌ³ணத்வஸாதா⁴ரணத்வஶங்கதயா வ்யாக்²யாய, தத: ஸ்வதந்த்ர ஏவ ப்ரதா⁴நகாரணநிராகரணஹேதுர்வ்யாக்²யேய: — ‘தந்நிஷ்ட²ஸ்ய மோக்ஷோபதே³ஶாத்’ இதி । தஸ்மாந்நாசேதநம் ப்ரதா⁴நம் ஸச்ச²ப்³த³வாச்யம் ॥ 7 ॥