ஸம்பத்தேரிதி ஜைமிநிஸ்ததா² ஹி த³ர்ஶயதி ॥ 31 ॥
ஸம்பத்திநிமித்தா வா ஸ்யாத்ப்ராதே³ஶமாத்ரஶ்ருதி: । குத: ? ததா²ஹி ஸமாநப்ரகரணம் வாஜஸநேயிப்³ராஹ்மணம் த்³யுப்ரப்⁴ருதீந்ப்ருதி²வீபர்யந்தாம்ஸ்த்ரைலோக்யாத்மநோ வைஶ்வாநரஸ்யாவயவாநத்⁴யாத்மமூர்த⁴ப்ரப்⁴ருதிஷு சுபு³கபர்யந்தேஷு தே³ஹாவயவேஷு ஸம்பாத³யத்ப்ராதே³ஶமாத்ரஸம்பத்திம் பரமேஶ்வரஸ்ய த³ர்ஶயதி — ‘ப்ராதே³ஶமாத்ரமிவ ஹ வை தே³வா: ஸுவிதி³தா அபி⁴ஸம்பந்நாஸ்ததா² நு வ ஏதாந்வக்ஷ்யாமி யதா² ப்ராதே³ஶமாத்ரமேவாபி⁴ஸம்பாத³யிஷ்யாமீதி । ஸ ஹோவாச மூர்தா⁴நமுபதி³ஶந்நுவாசைஷ வா அதிஷ்டா² வைஶ்வாநர இதி । சக்ஷுஷீ உபதி³ஶந்நுவாசைஷ வை ஸுதேஜா வைஶ்வாநர இதி । நாஸிகே உபதி³ஶந்நுவாசைஷ வை ப்ருத²க்³வர்த்மாத்மா வைஶ்வாநர இதி । முக்²யமாகாஶமுபதி³ஶந்நுவாசைஷ வை ப³ஹுலோ வைஶ்வாநர இதி । முக்²யா அப உபதி³ஶந்நுவாசைஷ வை ரயிர்வைஶ்வாநர இதி । சுபு³கமுபதி³ஶந்நுவாசைஷ வை ப்ரதிஷ்டா² வைஶ்வாநர:’ இதி । சுபு³கமித்யத⁴ரம் முக²ப²லகமுச்யதே । யத்³யபி வாஜஸநேயகே த்³யௌரதிஷ்டா²த்வகு³ணா ஸமாம்நாயதே, ஆதி³த்யஶ்ச ஸுதேஜஸ்த்வகு³ண:, சா²ந்தோ³க்³யே புந: த்³யௌ: ஸுதேஜஸ்த்வகு³ணா ஸமாம்நாயதே, ஆதி³த்யஶ்ச விஶ்வரூபத்வகு³ண:; ததா²பி நைதாவதா விஶேஷேண கிஞ்சித்³தீ⁴யதே, ப்ராதே³ஶமாத்ரஶ்ருதேரவிஶேஷாத் , ஸர்வஶாகா²ப்ரத்யயத்வாச்ச । ஸம்பத்திநிமித்தாம் ப்ராதே³ஶமாத்ரஶ்ருதிம் யுக்ததராம் ஜைமிநிராசார்யோ மந்யதே ॥ 31 ॥