सूत्रावयवान्तरमुपादत्ते -

शब्दान्तराच्चेति ।

युक्तेरिव शब्दादपि कार्यस्य सत्त्वमनन्यत्वं च सिध्यतीति वक्तव्ये कथमन्तरपदमन्तराले प्रयुज्यते, तत्राह -

पूर्वसूत्र इति ।

प्रकारान्तरेण शब्दान्तरं विभजते -

तद्धैक इति ।

कारणस्येत्थं सत्त्वेऽपि कथं कार्यस्य सत्त्वसिद्धिरित्याशङ्क्याह -

तत्रेति ।

उक्ता श्रुतिः सप्तम्यर्थः ।

प्रतिज्ञानुपपत्तेश्च न सत्कार्यवादानुपपत्तिरिति चकारसूचितामुपपत्तिमाह -

यदि त्विति ।

कथं तर्हि प्रतिज्ञोपपद्यते, तत्राह -

सत्त्वेति ॥ १८ ॥