सूत्रान्तरमवतारयितुमाक्षिपति -

कथमिति ।

चैतन्यं गुणत्वान्न गुणिनोऽन्यत्रेत्यत्र दृष्टान्तमाह -

नहीति ।

यथा दीपस्य गुणोऽपि प्रभा तदतिरेकेणाशेषमपवरकोदरं व्याप्नोति तथा चैतन्यमात्मनो गुणोऽपि तमतिक्रम्य सर्वं देहं व्याप्नुयादतो व्यभिचारान्नानुमेति शङ्कते -

प्रदीपेति ।

प्रभाया गुणत्वाभावान्नैवमित्याह -

नेति ।

द्वयोरपि तेजोद्रव्यत्वे कथमवान्तरभेदः, तत्राह -

निबिडेति ।

गुणत्वस्य गन्धे व्यभिचारमाह -

अत इति ।