किञ्च भौतिकप्राणगत्यनुपपत्त्या तत्कारणभूतगतिरवश्यम्भाविनी भूतगतिश्चेदिष्टा देहान्तरारम्भकत्वमपि तेषां स्यादित्याह -

प्राणेति ।

सूत्रं विभजते -

प्राणानां चेति ।

तेषां गमनेऽपि कुतो देहबीजानां भूतानां गतिः, तत्राह -

सा चेति ।

स्वतन्त्राणामेव प्राणानां गमनं किं न स्यादित्याशङ्क्याह -

नहीति ।

प्राणा हि जीवतः साश्रया दृष्टास्तेनोत्क्रमणेऽपि तेषां साश्रयत्वमित्यर्थः ॥ ३ ॥