किञ्च विदुषा ब्रह्मणाऽन्येषामृत्विजां पाल्यत्वोक्तेरपि न सर्वविज्ञानोपसंहारधीरित्याह -

दर्शनाच्चेति ।

सूत्रं त्रिभजते -

दर्शयतीति ।

ऋग्वेदादिविहिताङ्गलोपे व्याहृतिहोमप्रायश्चित्तादिविज्ञानवत्त्वमेवंवित्त्वं ब्रह्मणोऽमीष्टं कथं तावता विवक्षितानुपसंहारः, तत्राह -

सर्वेति ।

अस्ति च तेनेतरेषामृत्विजां पाल्यत्वकीर्तनं तेन प्रत्ययानुपसंहारधीरिति शेषः ।

अनुमानाल्लिङ्गाच्च सिद्धमर्थमुपसंहरति -

तस्मादिति ।

याथाकाम्यं व्याचष्टे -

समुच्चयो विकल्पो वेतीति ॥ ६६ ॥