पूर्वपक्षहेतूनेवमुन्मथ्य स्वपक्षे हेत्वन्तरमाह -

कामेति ।

इतश्च विद्याया न कर्माङ्गतेति चकारार्थमाह -

अपिचेति ।

स्वेच्छातः । कर्मसाधनप्रजादित्यागलिङ्गादपि विद्यायाः स्वातन्त्र्यमिति हेत्वन्तरमेव स्फोरयति -

एक इति ।

येषां नोऽस्माकमयमपरोक्षः सन्नात्मायं लोकः प्रत्यक्षं फलं ते वयं किं प्रजया करिष्याम इति निश्चित्याग्निहोत्रादि न हुतवन्त इत्यर्थः ।

मोक्षस्यादृष्टफलत्वात्कथं मुक्तत्वनिश्चयात्प्रजादित्यागसिद्धिः, तत्राह -

अनुभवेति ।

ब्रह्मधीर्न क्रतुप्रयोगविधिनादेया क्रत्वङ्गसम्बन्धित्वेऽपि फलान्तरयोगित्वाद्गोदोहनवदिति मत्वाह -

अतोऽपीति ॥ १५ ॥