अद्वैतशारदा | दक्षिणाम्नाय श्रीशारदापीठम्, शृङ्गेरी

कृत्स्नभावात्तु गृहिणोपसंहारः ॥ ४८ ॥

तुशब्दो विशेषणार्थः । कृत्स्नभावोऽस्य विशेष्यते । बहुलायासानि हि बहून्याश्रमकर्माणि यज्ञादीनि तं प्रति कर्तव्यतयोपदिष्टानि, आश्रमान्तरकर्माणि च यथासम्भवमहिंसेन्द्रियसंयमादीनि तस्य विद्यन्ते । तस्मात् गृहमेधिना उपसंहारो न विरुध्यते ॥ ४८ ॥

तुशब्द इति ; आश्रमान्तरेति ; तस्मादिति ॥ ४८ ॥ ;

सूत्रं व्याचष्टे -

तुशब्द इति ।

ननु यथा गृहिणो यज्ञादीनि कर्तव्यत्वेनोक्तानि तथाश्रमान्तराणामपि करणसंयमादिकर्मान्तराण्युच्यन्ते तथाच कोऽस्य विशेषः, तत्राह -

आश्रमान्तरेति ।

गृहमेधिनि विशेषे सिद्धे फलितमाह -

तस्मादिति ॥ ४८ ॥