तदुत्तरत्वेन सूत्रमवतारयति -

अत्रेति ।

स्मार्तमुपासनं प्रत्ययं कालभेदविनियोगः स्मार्तोऽभ्युपगम्यते प्रत्यासत्तेरिति व्याचष्टे -

योगिन इति ।

योगी दहराद्युपासक एव किं न स्यात् , तत्राह -

स्मार्ते चेति ।

नित्यमग्निहोत्रादीश्वराराधनरूपेण यदनुष्ठीयते स योगः ‘अनाश्रितः कर्मफलम्’ इत्यादिस्मृतेः । इन्द्रियाणीन्द्रियार्थेषु वर्तन्त इति धारणापूर्वकोऽकर्तृत्वानुभवः साङ्ख्यमिति भेदः ।

श्रौतदहराद्युपास्तीनां स्मृत्यविषयत्वे फलितमाह -

अत इति ।

श्रुतिस्मृत्योर्भिन्नार्थत्वं प्रत्यभिज्ञाविरुद्धमिति शङ्कते -

नन्विति ।

कालभेदविधिपरत्वमङ्गीकृत्य विषयव्यवस्थोक्ता प्रत्यभिज्ञानेन कालाभिधानद्वारा देवतोक्तौ श्रुतिस्मृत्योरेकार्थत्वमेवेति कुतो विरोधशङ्केत्याह -

उच्यत इति ।

तदेवं दक्षिणायने मृतस्यापि विदुषो विद्याफलमवश्यम्भावीत्यधिकरणार्थमुपसंहर्तुमितीत्युक्तम् ॥ २१ ॥