जीवस्य देहपरिमाणतां दूषयति -

एवं चेति ।

अकार्त्स्न्यं मध्यमपरिमाणत्वम् । तेनानित्यत्वं स्यादित्यर्थः ।

अर्थान्तरमाह -

शरीराणां चेति ।

विपाकः कर्मणामभिव्यक्तिः । जीवस्य कृत्स्नगजशरीरव्यापित्वमकार्त्स्न्यम् । शरीरैकदेशो निर्जीवः स्यादित्यर्थः । पुत्तिकादेहे कृत्स्नो जीवो न प्रविशेत् । देहाद्बहिरपि जीवः स्यादित्यर्थः ।

किञ्च बालदेहमात्र आत्मा ततः स्थूले युवदेहे क्वचित्स्यादिति कृत्स्नदेहः सजीवो न स्यादित्याह -

समान इति ।

यथा दीपावयवानां घटे सङ्कोचो गेहे विकासस्तथा जीवावयवानामिति देहमानत्वनियमं शङ्कते -

स्यादिति ।

दीपांशवज्जीवांशा भिन्नदेशा एकदेशा वेति विकल्प्याद्येऽल्पदेहाद्बहिरपि जीवः स्यादिति दूषयति -

तेषामित्यादिना ।

दीपस्य तु न घटाद्बहिः सत्त्वमधिकावयवानां विनाशात् ।

द्वितीयं दूषयति -

अप्रतिघात इति ।

अवयवानां नित्यत्वं चासिद्धमल्पत्वाद्दीपांशवदित्याह -

अपि चेति ॥३४॥