వ్యాచిఖ్యాసితయజుషాం స్వరూపం దర్శయతి —
ఎతానీతి ।
మన్త్రార్థశబ్దేన పదార్థో వాక్యార్థస్తత్ఫలం చేతి త్రయముచ్యతే ।
లౌకికం తమో వ్యావర్తయతి —
సర్వం హీతి ।
పూర్వోక్తపదేన వ్యాఖ్యాతం తమో గృహ్యతే ।
వైపరీత్యే హేతుమాహ —
ప్రకాశాత్మకత్వాదితి ।
జ్ఞానం తేన సాధ్యమితి యావత్ । పదార్థోక్తిసమాప్తావితిశబ్దః ।
ఉత్తరవాక్యాభ్యాం వాక్యార్థస్తత్ఫలం చేతి ద్వయం క్రమేణోచ్యత ఇత్యాహ —
పూర్వవదితి ।
ఫలవాక్యమాదాయ పూర్వస్మాద్విశేషం దర్శయతి —
అమృతమితి ।
ప్రథమద్వితీయమన్త్రయోరర్థభేదాప్రతీతేః పునరుక్తిమాశఙ్క్యావాన్తరభేదమాహ —
పూర్వో మన్త్ర ఇతి ।
తథాఽపి తృతీయే మన్త్రే పునరుక్తిస్తదవస్థేత్యాశఙ్క్యాఽఽహ —
పూర్వయోరితి ।