ஆத்⁴யாத்மிகப்ராணவிஷயம் வாக்யமவதார்ய வ்யாகரோதி —
அதே²தி ।
முகா²தௌ³ ஸம்சார்யா ஸம்சரணார்ஹா ஹ்ருத³யஸம்ப³ந்தி⁴நீ யா வாயுவ்ருத்தி:, தத்ர ப்ராணஶப்³த³ப்ரவ்ருத்தௌ நிமித்தமாஹ —
ப்ரணயநாதி³தி ।
புரதோ நி:ஸரணாதி³தி யாவத் । ஹ்ருத³யாத³தோ⁴ தே³ஶே வ்ருத்திரஸ்யேத்யதோ⁴வ்ருத்திராநாபி⁴ஸ்தா²நோ ஹ்ருத³யாதா³ரப்⁴ய நாபி⁴பர்யந்தம் வர்தமாந இதி யாவத் । வ்யாயமநம் ப்ராணாபாநயோர்நியமநம் கர்மாஸ்யேதி ததோ²க்த: । வீர்யவத்கர்மாரண்யாமக்³ந்யுத்பாத³நாதி³ । உத்கர்ஷோ தே³ஹே புஷ்டி: । ஆதி³பதே³நோத்க்ராந்திருக்தா ।
ப்ராணஶப்³தே³நாநஶப்³த³ஸ்ய புநருக்திமாஶங்க்யா(அ)(அ)ஹ —
அந இத்யேஷாமிதி ।
ததா²(அ)பி த்ருதீயஸ்ய ப்ராணஶப்³த³ஸ்ய தாப்⁴யாம் புநருக்திரித்யாஶங்க்யா(அ)(அ)ஹ —
ப்ராண இதீதி ।
ஸாதா⁴ரணாஸாதா⁴ரணவ்ருத்திமாந்ப்ராண இத்யபௌநருக்த்யமித்யர்த²: ।
மநஸோ த³ர்ஶநாதி³வத்³வாசோ(அ)பி⁴தே⁴யப்ரகாஶநவச்ச ப்ராணஸ்யாபி கார்யம் வக்தவ்யமித்யாஶங்க்யா(அ)(அ)ஹ —
கர்ம சேதி ।
ஏதந்மய இத்யத்ர மயடோ விகாரார்த²த்வம் வ்ருத்தஸம்கீர்தநபூர்வகம் கத²யதி —
வ்யாக்²யாதாநீதி ।
ஆத்⁴யாத்மிகாநாம் வாகா³தீ³நாமநாரம்ப⁴கத்வம் வாரயதி —
ப்ராஜாபத்யைரிதி ।
ஆரப்³த⁴ஸ்வரூபம் ப்ரஶ்நபூர்வகமநந்தரவாக்யேந நிர்தா⁴ரயதி —
கோ(அ)ஸாவிதி ।
கார்யகரணஸம்கா⁴தே கத²மாத்மஶப்³த³ப்ரவ்ருத்திரித்யாஶங்க்யா(அ)(அ)ஹ —
ஆத்மஸ்வரூபத்வேநேதி ।
வாங்மய இத்யாதி³வாக்யஸ்ய பூர்வேண பௌநருக்த்யமாஶங்க்யா(அ)(அ)ஹ —
அவிஶேஷேணேதி ॥3॥