యత్ యది వృక్షో వృక్ణః ఛిన్నః రోహతి పునః పునః ప్రరోహతి ప్రాదుర్భవతి మూలాత్ పునర్నవతరః పూర్వస్మాదభినవతరః ; యదేతస్మాద్విశేషణాత్ప్రాక్ వనస్పతేః పురుషస్య చ, సర్వం సామాన్యమవగతమ్ ; అయం తు వనస్పతౌ విశేషో దృశ్యతే — యత్ ఛిన్నస్య ప్రరోహణమ్ ; న తు పురుషే మృత్యునా వృక్ణే పునః ప్రరోహణం దృశ్యతే ; భవితవ్యం చ కుతశ్చిత్ప్రరోహణేన ; తస్మాత్ వః పృచ్ఛామి — మర్త్యః మనుష్యః స్విత్ మృత్యునా వృక్ణః కస్మాత్ మూలాత్ ప్రరోహతి, మృతస్య పురుషస్య కుతః ప్రరోహణమిత్యర్థః ॥