अद्वैतशारदा | दक्षिणाम्नाय श्रीशारदापीठम्, शृङ्गेरी

इन्धो ह वै नामैष योऽयं दक्षिणेऽक्षन्पुरुषस्तं वा एतमिन्धं सन्तमिन्द्र इत्याचक्षते परोक्षेणैव परोक्षप्रिया इव हि देवाः प्रत्यक्षद्विषः ॥ २ ॥

इन्धो ह वै नाम । इन्ध इत्येवंनामा, यः चक्षुर्वै ब्रह्मेति पुरोक्त आदित्यान्तर्गतः पुरुषः स एषः, योऽयं दक्षिणे अक्षन् अक्षणि विशेषेण व्यवस्थितः — स च सत्यनामा ; तं वै एतं पुरुषम् , दीप्तिगुणत्वात् प्रत्यक्षं नाम अस्य इन्ध इति, तम् इन्धं सन्तम् इन्द्र इत्याचक्षते परोक्षेण । यस्मात्परोक्षप्रिया इव हि देवाः प्रत्यक्षद्विषः प्रत्यक्षनामग्रहणं द्विषन्ति । एष त्वं वैश्वानरमात्मानं सम्पन्नोऽसि ॥

इन्ध इति ; यश्चक्षुरिति ; योऽयमिति ; स चेति ; तं वा एतमिति ; दीप्तीति ; यस्मादिति ॥२॥ ;

विश्वतैजसप्राज्ञानुवादेन तुरीयं ब्रह्म दर्शयितुमादौ विश्वमनुवदति —

इन्ध इति ।

कोऽसाविन्धनामेति चेत्तमाह —

यश्चक्षुरिति ।

अधिदैवतं पुरुषमुक्त्वाऽध्यात्मं तं दर्शयति —

योऽयमिति ।

तस्य पूर्वस्मिन्नपि ब्राह्मणे प्रस्तुतत्वमाह —

स चेति ।

प्रकृते पुरुषे विदुषां सम्मतिमाह —

तं वा एतमिति ।

इन्धत्वं साधयति —

दीप्तीति ।

प्रत्यक्षस्य परोक्षेणाऽऽख्याने हेतुमाह —

यस्मादिति ॥२॥