యో హ వా ఆయతనం వేద ; ఆయతనమ్ ఆశ్రయః, తత్ యో వేద, ఆయతనం స్వానాం భవతి, ఆయతనం జనానామన్యేషామపి । కిం పునః తత్ ఆయతనమిత్యుచ్యతే — మనో వై ఆయతనమ్ ఆశ్రయః ఇన్ద్రియాణాం విషయాణాం చ ; మనఆశ్రితా హి విషయా ఆత్మనో భోగ్యత్వం ప్రతిపద్యన్తే ; మనఃసఙ్కల్పవశాని చ ఇన్ద్రియాణి ప్రవర్తన్తే నివర్తన్తే చ ; అతో మన ఆయతనమ్ ఇన్ద్రియాణామ్ । అతో దర్శనానురూప్యేణ ఫలమ్ , ఆయతనం స్వానాం భవతి, ఆయతనం జనానామ్ , య ఎవం వేద ॥