अयोनौ रेतःस्खलने प्रायश्चित्तमुक्तं रेतोयोनावुदके रेतःसिचश्छायादर्शने प्रायश्चित्तं दर्शयति —

अथेत्यादिना ।

निमित्तान्तरे प्रायश्चित्तान्तरप्रदर्शनप्रक्रमार्थोऽथशब्दः । मयि तेजःप्रभृति देवाः कल्पयन्त्विति मन्त्रयोजना ।

प्रकृतेन रेतःसिचा यस्यां पुत्रो जनयितव्यस्तां स्त्रियं स्तौति —

श्रीरित्यादिना ।

कथं सा यशस्विनी न हि तस्याः ख्यातिरस्ति तत्राऽऽह —

यदिति ।

रजस्वलाभिगमनादि प्रतिषिद्धमित्याशङ्क्य विशिनष्टि —

त्रिरात्रेति ॥६॥

ज्ञापयेदात्मीयं प्रेमातिरेकमिति शेषः ।