अतो यानीत्यादि व्याचष्टे –

न केवलमिति ।

व्यानेन निर्वर्तयतीति पूर्वेण सम्बन्धः । यान्यन्यान्यपि यथोक्तानि कर्माणि तानि लोको व्यानेनैव करोतीत्युत्तरत्र सम्बन्धः ।

प्रयत्नाधिक्यनिर्वर्त्यानि कर्माण्येवोदाहरति –

यथेति ।

यथा तानि कर्माणि तथाऽन्यान्यप्येवंप्रकाराणीति योजना ।

व्यानस्य वीर्यवत्कर्महेतुत्वे फलितमाह –

अत इति ।

वैशिष्ट्येऽपि किं स्यादिति चेत्तदाह –

विशिष्टस्येति ।

वैशिष्ट्यफलमुपसंहरति –

एतस्येति ।

फलवत्त्वादित्युक्तमुपास्तिफलं स्पष्टयति –

कर्मेति ।

व्यानदृष्ट्योद्गीथोपासनस्याङ्गावबद्धत्वादिति शेषः ॥ ५ ॥