श्रुतिराहोत्तरं वाक्यमित्युक्तं तदादाय व्याकरोति –

अथेत्यादिना ।

ब्रह्मचर्यस्योक्तरीत्या विधित्सितत्वे तदीयस्तुतिप्रारम्भार्थोऽथशब्दः ।

यज्ञस्य ब्रह्मचर्येऽन्तर्भावं साधयति –

यज्ञस्यापीति ।

उक्तमेवार्थमाकाङ्क्षाद्वारा समर्थयते –

कथमित्यादिना ।

पारम्पर्येण चित्तशुद्धिद्वारेणेत्यर्थः ।

न केवलं फलद्वारा यज्ञो ब्रह्मचर्येऽन्तर्भवति किन्तु यकारज्ञकारसम्स्पर्शादपीत्याह –

यो ज्ञातेति ।

इष्टस्य ब्रह्मचर्यान्तर्भावमाकाङ्क्षाद्वारा स्फोरयति –

कथमित्यादिना ।

पूजयित्वा तमात्मानमनुनिन्दत इति सम्बन्धः ।

ब्रह्मचर्येणाऽत्मविषयैषणं निष्पाद्यते इष्टेनापि तदेव सम्पाद्यते तस्मादेषणादुभयसादृश्यादिष्टमपि यज्ञवद्ब्रह्मचर्यमेवेत्याह –

एषणादिति ॥१॥