ಅನ್ಯೇಽಪಿ ಪ್ರತಿಪಕ್ಷೇ ಪರಾಕ್ರಮಭಾಜೋ ಬಹವಃ ಸಂತೀತ್ಯನುಪೇಕ್ಷಣೀಯತ್ವಂ ಪರಪಕ್ಷಸ್ಯ ವಿವಕ್ಷಯನ್ನಾಹ -

ಅತ್ರೇತಿ ।

ಅಸ್ಯಾಂ ಹಿ ಪ್ರತಿಪಕ್ಷಭೂತಾಯಾಂ ಸೇನಾಯಾಂ ಶೂರಾಃ - ಸ್ವಯಮಭೀರವಃ ಶಸ್ತ್ರಾಸ್ತ್ರಕುಶಲಾಃ ಭೀಮಾರ್ಜುನಾಭ್ಯಾಂ ಸರ್ವಸಂಪ್ರತಿಪನ್ನವೀರ್ಯಾಭ್ಯಾಂ ತುಲ್ಯಾಃ ಯುದ್ಧಭೂಮಾವುಪಲಭ್ಯಂತೇ ।

ತೇಷಾಂ ಯುದ್ಧಶೌಂಡೀರ್ಯಂ ವಿಶದೀಕರ್ತುಂ ವಿಶಿನಷ್ಟಿ -

ಮಹೇಷ್ವಾಸಾ ಇತಿ ।

ಇಷುರಸ್ಯತೇಽಸ್ಮಿನ್ನಿತಿ ವ್ಯುತ್ಪತ್ತ್ಯಾ ಧನುಸ್ತದುಚ್ಯತೇ । ತಚ್ಚ ಮಹತ್ ಅನ್ಯೈರಪ್ರಧೃಷ್ಯಂ ತದ್ ಯೇಷಾಂ ತೇ ರಾಜಾನಸ್ತಥಾ ವಿವಕ್ಷ್ಯಂತೇ ।

ತಾನೇವ ಪರಸೇನಾಮಧ್ಯಮಧ್ಯಾಸೀನಾನ್ ಪರಪಕ್ಷಾನುರಾಗಿಣೋ ರಾಜ್ಞೋ ವಿಜ್ಞಾಪಯತಿ -

ಯುಯುಧಾನ ಇತ್ಯಾದಿನಾ ಸೌಭದ್ರೋ ದ್ರೌಪದೇಯಾಶ್ಚೇತ್ಯಂತೇನ ।