ఆత్మీయం బన్ధువర్గం యుద్ధేచ్ఛయా యుద్ధభూమావుపస్థితముపలభ్య శోకప్రవృత్తిం దర్శయతి -
సీదన్తీతి ।
దేవాంశస్యైవార్జునస్యానాత్మవిదః స్వపరదేహేష్వాత్మాత్మీయాభిమానవతః తత్ప్రియస్య యుద్ధారమ్భే తన్మృత్యుప్రసఙ్గదర్శినః శోకో మహానాసీదిత్యర్థః ।
అఙ్గేషు వ్యథా ముఖే పరిశోషశ్చేత్యుభయం శోకలిఙ్గముక్తమ్ । సమ్ప్రతి వేపథుప్రభృతీని భీతిలిఙ్గాన్యుపన్యస్యతి -
వేపథుశ్చేతి ।
రోమహర్షః - రోమ్ణాం గాత్రేషు పులకితత్వమ్ ॥ ౨౯ ॥