ಶ್ರೋತುರರ್ಜುನಸ್ಯ ಪೂರ್ವೋಕ್ತಮಾತ್ಮಯಾಥಾತ್ಮ್ಯಂ ಶ್ರುತ್ವಾಪಿ ತಸ್ಮಿನ್ ನಿರ್ಧಾರಣಾಸಿದ್ಧೇರ್ದ್ವಯೋರ್ಮತಯೋರನ್ಯತರಮತಾಭ್ಯುಪಗಮಃ ಶಂಕಿತಃ, ತದರ್ಥೋ ನಿಪಾತದ್ವಯಪ್ರಯೋಗ ಇತ್ಯಾಹ -

ಅಥ ಚೇತಿ ।

ಪ್ರಕೃತಸ್ಯ ಆತ್ಮನೋ ನಿತ್ಯತ್ವಾದಿಲಕ್ಷಣಸ್ಯ ಪುನಃಪುನರ್ಜಾತತ್ವಾಭಿಮಾನೋ ಮಾನಾಭಾವಾದಸಂಭವೀ ಇತ್ಯಾಶಂಕ್ಯಾಹ -

ಲೋಕೇತಿ ।

ನಿತ್ಯಜಾತತ್ವಾಭಿನಿವೇಶೇ ಪೌನಃಪುನ್ಯೇನ ಮೃತತ್ವಾಭಿನೇವೇಶೋ ವ್ಯಾಹತಃ ಸ್ಯಾದಿತ್ಯಶಂಕ್ಯಾಹ -

ತಥೇತಿ ।

ಪರಕೀಯಮತಮನುಭಾಷಿತಮಭ್ಯುಪೇತ್ಯ, ‘ಅಹೋ ಬತ ಮಹತ್ ಪಾಪಂ ಕರ್ತುಂ ವ್ಯವಸಿತಾ ವಯಮ್’ (ಭ. ಗೀ. ೧. ೪೫) ಇತ್ಯಾದೇಸ್ತದೀಯಶೋಕಸ್ಯ  ನಿರವಕಾಶತ್ವಮಿತ್ಯಾಹ -

ತಥಾಪೀತಿ ।

ಏವಮರ್ಜುನಸ್ಯ ದೃಶ್ಯಮಾನಮನುಶೋಕಪ್ರಕಾರಂ ದರ್ಶಯಿತ್ವಾ ತಸ್ಯ ಕರ್ತುಮಯೋಗ್ಯತ್ವೇ ಹೇತುಮಾಹ -

ಜನ್ಮವತ ಇತಿ ।

‘ಜನ್ಮವತೋ ನಾಶೋ ನಾಶವತಶ್ಚ ಜನ್ಮ’ ಇತ್ಯೇತೌ ಅವಶ್ಯಂಭಾವಿನೌ - ಮಿಥೋ ವ್ಯಾಪ್ತಾವಿತಿ ಯೋಜನಾ ॥ ೨೬ ॥