శ్రోతురర్జునస్య పూర్వోక్తమాత్మయాథాత్మ్యం శ్రుత్వాపి తస్మిన్ నిర్ధారణాసిద్ధేర్ద్వయోర్మతయోరన్యతరమతాభ్యుపగమః శఙ్కితః, తదర్థో నిపాతద్వయప్రయోగ ఇత్యాహ -
అథ చేతి ।
ప్రకృతస్య ఆత్మనో నిత్యత్వాదిలక్షణస్య పునఃపునర్జాతత్వాభిమానో మానాభావాదసమ్భవీ ఇత్యాశఙ్క్యాహ -
లోకేతి ।
నిత్యజాతత్వాభినివేశే పౌనఃపున్యేన మృతత్వాభినేవేశో వ్యాహతః స్యాదిత్యశఙ్క్యాహ -
తథేతి ।
పరకీయమతమనుభాషితమభ్యుపేత్య, ‘అహో బత మహత్ పాపం కర్తుం వ్యవసితా వయమ్’ (భ. గీ. ౧. ౪౫) ఇత్యాదేస్తదీయశోకస్య నిరవకాశత్వమిత్యాహ -
తథాపీతి ।
ఎవమర్జునస్య దృశ్యమానమనుశోకప్రకారం దర్శయిత్వా తస్య కర్తుమయోగ్యత్వే హేతుమాహ -
జన్మవత ఇతి ।
‘జన్మవతో నాశో నాశవతశ్చ జన్మ’ ఇత్యేతౌ అవశ్యంభావినౌ - మిథో వ్యాప్తావితి యోజనా ॥ ౨౬ ॥