ಕರ್ಮಣಾ ಸಹ ಸಮಾಧೇರನುಷ್ಠಾತುಮಶಕ್ಯತ್ವಾತ್ , ಅನೇಕಾಂತರಾಯಸಂಭವಾತ್ , ತತ್ಫಲಸ್ಯ ಚ ಸಾಕ್ಷಾತ್ಕಾರಸ್ಯ ದೀರ್ಘಕಾಲಾಭ್ಯಾಸಸಾಧ್ಯಸ್ಯೈಕಸ್ಮಿನ್ ಜನ್ಮನ್ಯಸಂಭಾವತ್ ಅರ್ಥಾತ್ ಯೋಗೀ ಭ್ರಶ್ಯೇತ, ಅನರ್ಥೇ ಚ ನಿಪತೇತ್ , ಇತ್ಯಾಶಂಕ್ಯಾಹ -
ನೇಹೇತಿ ।
ಪ್ರತೀಕತ್ವೇನೋಪಾತ್ತಸ್ಯ ನಕಾರಸ್ಯ ಪುನರನ್ವಯಾನುಗುಣತ್ವೇನ ನಾಸ್ತೀತ್ಯನುವಾದಃ ।
ಯತ್ತು - ಕರ್ಮಾನುಷ್ಠಾನಸ್ಯ ಅನೈಕಾಂತಿಕಫಲತ್ವೇನ ಅಕಿಂಚಿತ್ಕರತ್ವಮುಕ್ತಂ ತದ್ದೂಷಯತಿ -
ಯಥೇತಿ ।
ಕೃಷಿವಾಣಿಜ್ಯಾದೇರಾರಂಭಸ್ಯ ಅನಿಯತಂ ಫಲಮ್ , ಸಂಭಾವನಾಮಾತ್ರೋಪನೀತತ್ವಾತ್ , ನ ತಥಾ ಕರ್ಮಣಿ ವೈದಿಕೇ ಪ್ರಾರಂಭಸ್ಯ ಫಲಮನಿಯತಂ ಯುಜ್ಯತೇ, ಶಾಸ್ತ್ರವಿರೋಧಾದಿತ್ಯರ್ಥಃ ।
ಯತ್ತೂಕ್ತಮ್ - ಅನೇಕಾನರ್ಥಕಲುಷಿತತ್ವೇನ ದೋಷವದನುಷ್ಠಾನಮಿತಿ, ತತ್ರಾಹ -
ಕಿಂಚೇತಿ ।
ಇತೋಽಪಿ ಕರ್ಮಾನುಷ್ಠಾನಮಾವಶ್ಯಕಮಿತಿ ಪ್ರತಿಜ್ಞಾಯ ಹೇತ್ವಂತರಮಪಿ ಸ್ಫುಟಯತಿ -
ನಾಪೀತಿ ।
ಚಿಕಿತ್ಸಾಯಾಂ ಹಿ ಕ್ರಿಯಮಾಣಾಯಾಂ ವ್ಯಾಧ್ಯತಿರೇಕೋ ವಾ ಮರಣಂ ವಾ ಪ್ರತ್ಯವಾಯೋಽಪಿ ಸಂಭಾವ್ಯತೇ, ಕರ್ಮಪರಿಪಾಕಸ್ಯ ದುರ್ವಿವೇಕತ್ವಾತ್ । ನ ತಥಾ ಕರ್ಮಾನುಷ್ಠಾನೇ ದೋಷೋಽಸ್ತಿ, ವಿಹಿತತ್ವಾದಿತ್ಯರ್ಥಃ ।
ಸಂಪ್ರತಿ ಕರ್ಮಾನುಷ್ಠಾನಸ್ಯ ಫಲಂ ಪೃಚ್ಛತಿ -
ಕಿಂ ನ್ವಿತಿ ।
ಉತ್ತರಾರ್ಧಂ ವ್ಯಾಕುರ್ವನ್ ವಿವಕ್ಷಿತಂ ಫಲಂ ಕಥಯತಿ -
ಸ್ವಲ್ಪಮಪೀತಿ ।
ಸಮ್ಯಗ್ಜ್ಞಾನೋತ್ಪಾದನದ್ವಾರೇಣ ರಕ್ಷಣಂ ವಿವಕ್ಷಿತಮ್ - ‘ಸರ್ವಪಾಪಪ್ರಸಕ್ತೋಽಪಿ ಧ್ಯಾಯನ್ನಿಮಿಷಮಚ್ಯುತಮ್ । ಯತಿಸ್ತಪಸ್ವೀ ಭವತಿ ಪಂಕ್ತಿಪಾವನಪಾವನಃ ॥ ‘ ಇತಿ ಸ್ಮೃತೇರಿತ್ಯರ್ಥಃ ॥ ೪೦ ॥