अद्वैतशारदा | दक्षिणाम्नाय श्रीशारदापीठम्, शृङ्गेरी

భోగైశ్వర్యప్రసక్తానాం తయాపహృతచేతసామ్ ।
వ్యవసాయాత్మికా బుద్ధిః సమాధౌ న విధీయతే ॥ ౪౪ ॥

భోగైశ్వర్యప్రసక్తానాం భోగః కర్తవ్యః ఐశ్వర్యం చ ఇతి భోగైశ్వర్యయోరేవ ప్రణయవతాం తదాత్మభూతానామ్ । తయా క్రియావిశేషబహులయా వాచా అపహృతచేతసామ్ ఆచ్ఛాదితవివేకప్రజ్ఞానాం వ్యవసాయాత్మికా సాఙ్‍ఖ్యే యోగే వా బుద్ధిః సమాధౌ సమాధీయతే అస్మిన్ పురుషోపభోగాయ సర్వమితి సమాధిః అన్తఃకరణం బుద్ధిః తస్మిన్ సమాధౌ, న విధీయతే న భవతి ఇత్యర్థః ॥ ౪౪ ॥

తయేతి ; సమాధీయత ఇతి ;

తథాపి శాస్త్రానుసారిణ్యా వివేకప్రజ్ఞయా వ్యవసాయాత్మికా బుద్ధిస్తేషాముదేష్యతి, ఇత్యాశఙ్క్యాహ-

తయేతి ।

నను - సమాధిః సమ్ప్రజ్ఞాతాసమ్ప్రజ్ఞాతభేదేన ద్విధోచ్యతే, తత్ర బుద్ధిద్వయవిధిరప్రసక్తః సన్ కథం నిషిధ్యతే ? తత్రాహ -

సమాధీయత ఇతి

॥ ౪౪ ॥