अद्वैतशारदा | दक्षिणाम्नाय श्रीशारदापीठम्, शृङ्गेरी

ಶ್ರುತಿವಿಪ್ರತಿಪನ್ನಾ ತೇ ಯದಾ ಸ್ಥಾಸ್ಯತಿ ನಿಶ್ಚಲಾ ।
ಸಮಾಧಾವಚಲಾ ಬುದ್ಧಿಸ್ತದಾ ಯೋಗಮವಾಪ್ಸ್ಯಸಿ ॥ ೫೩ ॥

ಶ್ರುತಿವಿಪ್ರತಿಪನ್ನಾ ಅನೇಕಸಾಧ್ಯಸಾಧನಸಂಬಂಧಪ್ರಕಾಶನಶ್ರುತಿಭಿಃ ಶ್ರವಣೈಃ ಪ್ರವೃತ್ತಿನಿವೃತ್ತಿಲಕ್ಷಣೈಃ ವಿಪ್ರತಿಪನ್ನಾ ನಾನಾಪ್ರತಿಪನ್ನಾ ವಿಕ್ಷಿಪ್ತಾ ಸತೀ ತೇ ತವ ಬುದ್ಧಿಃ ಯದಿ ಯಸ್ಮಿನ್ ಕಾಲೇ ಸ್ಥಾಸ್ಯತಿ ಸ್ಥಿರೀಭೂತಾ ಭವಿಷ್ಯತಿ ನಿಶ್ಚಲಾ ವಿಕ್ಷೇಪಚಲನವರ್ಜಿತಾ ಸತೀ ಸಮಾಧೌ, ಸಮಾಧೀಯತೇ ಚಿತ್ತಮಸ್ಮಿನ್ನಿತಿ ಸಮಾಧಿಃ ಆತ್ಮಾ, ತಸ್ಮಿನ್ ಆತ್ಮನಿ ಇತ್ಯೇತತ್ । ಅಚಲಾ ತತ್ರಾಪಿ ವಿಕಲ್ಪವರ್ಜಿತಾ ಇತ್ಯೇತತ್ । ಬುದ್ಧಿಃ ಅಂತಃಕರಣಮ್ । ತದಾ ತಸ್ಮಿನ್ಕಾಲೇ ಯೋಗಮ್ ಅವಾಪ್ಸ್ಯಸಿ ವಿವೇಕಪ್ರಜ್ಞಾಂ ಸಮಾಧಿಂ ಪ್ರಾಪ್ಸ್ಯಸಿ ॥ ೫೩ ॥

ಅನೇಕೇತಿ ; ವಿಕ್ಷಿಪ್ತೇತಿ ;

ಬುದ್ಧೇಃ ಶ್ರೃತಿವಿಪ್ರತಿಪನ್ನತ್ವಂ ವಿಶದಯತಿ -

ಅನೇಕೇತಿ ।

ನಾನಾಶ್ರುತಿಪ್ರತಿಪನ್ನತ್ವಮೇವ ಸಂಕ್ಷಿಪತಿ-

ವಿಕ್ಷಿಪ್ತೇತಿ ।

ಉಕ್ತಂ ಹೇತುದ್ವಯಮನುರುಧ್ಯ ವೈರಾಗ್ಯಪರಿಪಾಕಾವಸ್ಥಾ ಕಾಲಶಬ್ದಾರ್ಥಃ । ನೈಶ್ಚಲ್ಯಮ್ - ವಿಕ್ಷೇಪರಾಹಿತ್ಯಮ್ , ಅಚಲತ್ವಮ್ - ವಿಕಲ್ಪಶೂನ್ಯತ್ವಮ್ , ವಿಕ್ಷೇಪಃ - ವಿಪರ್ಯಯಃ, ವಿಕಲ್ಪಃ - ಸಂಶಯಃ - ಇತಿ ವಿವೇಕಃ । ವಿವೇಕದ್ವಾರಾ ಜಾತಾ ಪ್ರಜ್ಞಾ ಪ್ರಾಗುಕ್ತಾ ಬುದ್ಧಿಃ । ಸಮಾಧಿಃ - ತತ್ರೈವ ನಿಷ್ಠಾ ॥ ೫೩ ॥