ವಿವೇಕವತೋ ವಿದುಷೋ ವಿವೇಕಜನ್ಯಾ ಪ್ರಜ್ಞಾ ಕಥಂ ಪ್ರತಿಷ್ಠಾಂ ಪ್ರತಿಪದ್ಯತಾಮ್ ? ಇತ್ಯಾಶಂಕ್ಯಾಹ -

ಯಃ ಸರ್ವತ್ರೇತಿ ।

ನನು - ದೇಹಜೀವನಾದೌ ಸ್ಪೃಹಾ, ಶುಭಾಶುಭಪ್ರಾಪ್ತೌ ಹರ್ಷವಿಷಾದೌ ವಿದುಷೋ ವಿವಿದಿಷೋಶ್ಚ ಅವರ್ಜನೀಯೌ ? ಇತಿ ಪ್ರಜ್ಞಾಸ್ಥೈರ್ಯಾಸಿದ್ಧಿಃ, ತತ್ರಾಹ -

ಯೋ ಮುನಿರಿತಿ ।

ತತ್ತದಿತಿ ಶೋಭನವತ್ತ್ವೇನ ಅಶೋಭನವತ್ತ್ವೇನ ವಾ ಪ್ರಸಿದ್ಧತ್ವಂ ಪ್ರತಿನಿರ್ದಿಶ್ಯತೇ । ತದೇವ ವಿಭಜತೇ -

ಶುಭಮಿತಿ ।

ವಿಷಯೇಷು ಅಭಿಷಂಗಾಭಾವಃ ಶುಭಾದಿಪ್ರಾಪ್ತೌ ಹರ್ಷಾದ್ಯಭಾವಶ್ಚ ಪ್ರಜ್ಞಾಸ್ಥೈರ್ಯೇ ಕಾರಣಮಿತ್ಯಾಹ -

ತಸ್ಯೇತಿ

॥ ೫೭ ॥