ಅಶೇಷವಿಷಯತ್ಯಾಗೇ ಜೀವನಮಪಿ ಕಥಮ್ ? ಇತ್ಯಾಶಂಕ್ಯಾಹ -

ಜೀವನೇತಿ ।

ಸಂಭವದ್ರಾಗದ್ವೇಷಾದಿಕೇ ದೇಶೇ ನಿವಾಸವ್ಯಾವೃತ್ತ್ಯರ್ಥಂ ಚರತೀತ್ಯೇತದ್ ವ್ಯಾಚಷ್ಟೇ-

ಪರ್ಯಟತೀತಿ ।

‘ವಿಹಾಯ ಕಾಮಾನ್’ (ಭ. ಗೀ. ೨-೭೧) ಇತ್ಯನೇನ ಪುನರುಕ್ತಿಂ ಪರಿಹರತಿ-

ಶರೀರೇತಿ ।

ನಿಃಸ್ಪೃಹತ್ವಮುಕ್ತ್ವಾ ನಿರ್ಮಮತ್ವಂ ಪುನರ್ವದನ್ , ಕಥಂ ಪುನರುಕ್ತಿಮಾರ್ಥಿಕೀಂ ನ ಪಶ್ಯಸಿ ? ಇತ್ಯಾಶಂಕ್ಯಾಹ -

ಶರೀರಜೀವನೇತಿ ।

ಸತ್ಯಹಂಕಾರೇ ಮಮಕಾರಸ್ಯ ಆವಶ್ಯಕತ್ವಾತ್ ನಿರಹಂಕಾರತ್ವಂ ವ್ಯಾಕರೋತಿ -

ವಿದ್ಯಾವತ್ತ್ವಾದೀತಿ ।

‘ಸ ಶಾಂತಿಮಾಪ್ನೋತಿ’ ಇತ್ಯುಕ್ತಮುಪಸಂಹರತಿ -

ಸ ಏವಂಭೂತ ಇತಿ ।

ಸಂನ್ಯಾಸಿನೋ ಮೋಕ್ಷಮಪೇಕ್ಷಮಾಣಸ್ಯ ಸರ್ವಕಾಮಪರಿತ್ಯಾಗಾದೀನಿ ಶ್ಲೋಕೋಕ್ತಾನಿ ವಿಶೇಷಣಾನಿ ಯತ್ನಸಾಧ್ಯಾನಿ, ತತ್ಸಂಮತಿಫಲಂ ತು  ಕೈವಲ್ಯಮಿತ್ಯರ್ಥಃ ॥ ೭೧ ॥