ಉಕ್ತಮೇವ ಹೇತುಂ ಭಗವದನುಮತಿಕಥನೇನ ಸ್ಫುಟಯತಿ -

ಕರ್ಮೇತಿ ।

ಇತಶ್ಚ ತ್ವಯಾ ಕರ್ತವ್ಯಂ ಕರ್ಮೇತ್ಯಾಹ -

ಶರೀರೇತಿ ।

ತನ್ನಿಯತ ತಸ್ಯಾಧಿಕೃತಸ್ಯೇತಿ ಸಂಬಂಧಃ ।

ಸ್ವರ್ಗಾದಿಫಲೇ ದರ್ಶಪೂರ್ಣಮಾಸಾದಾವಧಿಕೃತಸ್ಯ ತಸ್ಯ ತದಪಿ ನಿತ್ಯಂ ಸ್ಯಾದಿತ್ಯಾಶಂಕ್ಯ ವಿಶಿನಷ್ಟಿ -

ಫಲಾಯೇತಿ ।

ನಿತ್ಯಂ - ನಿಯಮೇನ ಕರ್ತವ್ಯಮಿತ್ಯತ್ರ ಹೇತುಮಾಹ -

ಯತ ಇತಿ ।

ಹಿಶಬ್ದೋಪಾತ್ತಮುಕ್ತಮೇವ ಹೇತುಮನುವದತಿ -

ಯಸ್ಮಾದಿತಿ ।

ಕರಣಸ್ಯ ಅಕರಣಾಜ್ಜ್ಯಾಯಸ್ತ್ವಂ ಪ್ರಶ್ನಪೂರ್ವಕಂ ಪ್ರಕಟಯತಿ -

ಕಥಮಿತ್ಯಾದಿನಾ ।

ಸತ್ಯೇವ ಕರ್ಮಣಿ ದೇಹಾದಿಚೇಷ್ಟಾದ್ವಾರಾ ಶರೀರಂ ಸ್ಥಾತುಂ ಪಾರಯತಿ, ತದಭಾವೇ ಜೀವನಮೇವ ದುರ್ಲಭಂ ಭವೇದಿತಿ ಫಲಿತಮಾಹ -

ಅತ ಇತಿ

॥ ೮ ॥