ಕಥಮಸ್ಮಾಭಿರ್ಭಾವಿತಾಃ ಸಂತೋ ದೇವಾ ಭಾವಯಿಷ್ಯಂತಿ ಅಸ್ಮಾನಿತಿ, ತದಾಹ -

ಇಷ್ಟಾನಿತಿ ।

ಯಜ್ಞಾನುಷ್ಠಾನೇನ ಪೂರ್ವೋಕ್ತರೀತ್ಯಾ ಸ್ವರ್ಗಾಪವರ್ಗಯೋರ್ಭಾವೇಽಪಿ, ಕಥಂ ಸ್ತ್ರೀಪಶುಪುತ್ರಾದಿಸಿದ್ಧಿರಿತ್ಯಾಶಂಕ್ಯ, ಪೂರ್ವಾರ್ಧಂ ವ್ಯಾಕರೋತಿ -

ಇಷ್ಟಾನ್ ಅಭಿಪ್ರೇತಾನಿತಿ ।

ಪಶ್ವಾದಿಭಿಶ್ಚ ಯಜ್ಞಾನುಷ್ಠಾನದ್ವಾರಾ ಭೋಗೋ ನಿರ್ವರ್ತನೀಯಃ, ಅನ್ಯಥಾ ಪ್ರತ್ಯವಾಯಪ್ರಸಂಗಾದಿತ್ಯುತ್ತರಾರ್ಧಂ ವ್ಯಾಚಷ್ಟೇ -

ತೈರಿತಿ ।

ಆನೃಣ್ಯಮಕೃತ್ವಾ ಇತ್ಯಸ್ಯ ಅಯಮರ್ಥಃ - ದೇವಾನಾಮೃಷೀಣಾಂ ಪಿತೃಣಾಂ ಚ ಯಜ್ಞೇನ ಬ್ರಹ್ಮಚರ್ಯೇಣ ಪ್ರಜಯಾ ಚ ಸಂತೋಷಮನಾಪಾದ್ಯ, ಸ್ವಕೀಯಂ ಕಾರ್ಯಕರಣಸಂಘಾತಮೇವ ಪೋಷ್ಟುಂ ಭುಂಜಾನಸ್ತಸ್ಕರೋ ಭವತೀತಿ ॥ ೧೨ ॥