ఉక్తేఽర్థే స్మృత్యన్తరం సంవాదయతి -

అగ్నావితి ।

తత్ర హి దేవతాభిధ్యానపూర్వకం తదుద్దేశేన ప్రహితాహుతిరపూర్వతాం గతా రశ్మిద్వారేణాదిత్యమారుహ్య, వృష్ట్యాత్మనా పృథివీం ప్రాప్య, వ్రిహియవాద్యన్నభావమాపద్య, సంస్కృతోపభుక్తా శుక్రశోణితరూపేణ పరిణతా ప్రజాభావం ప్రాప్నోతీత్యర్థః ।

‘యజ్ఞః కర్మసముద్భవః’ (భ. గీ. ౩-౧౪) ఇత్యయుక్తం, స్వస్యైవ స్వోద్భవే కారణత్వాయోగాదిత్యాశఙ్క్యాహ -

ఋత్విగితి ।

ద్రవ్యదేవతయోః సఙ్గ్రాహకశ్చకారః ॥ ౧౪ ॥