కర్మణైవ హి యస్మాత్ పూర్వే క్షత్రియాః విద్వాంసః సంసిద్ధిం మోక్షం గన్తుమ్ ఆస్థితాః ప్రవృత్తాః । కే ? జనకాదయః జనకాశ్వపతిప్రభృతయః । యది తే ప్రాప్తసమ్యగ్దర్శనాః, తతః లోకసఙ్గ్రహార్థం ప్రారబ్ధకర్మత్వాత్ కర్మణా సహైవ అసంన్యస్యైవ కర్మ సంసిద్ధిమాస్థితా ఇత్యర్థః । అథ అప్రాప్తసమ్యగ్దర్శనాః జనకాదయః, తదా కర్మణా సత్త్వశుద్ధిసాధనభూతేన క్రమేణ సంసిద్ధిమాస్థితా ఇతి వ్యాఖ్యేయః శ్లోకః । అథ మన్యసే పూర్వైరపి జనకాదిభిః అజానద్భిరేవ కర్తవ్యం కర్మ కృతమ్ ; తావతా నావశ్యమన్యేన కర్తవ్యం సమ్యగ్దర్శనవతా కృతార్థేనేతి ; తథాపి ప్రారబ్ధకర్మాయత్తః త్వం లోకసఙ్గ్రహమ్ ఎవ అపి లోకస్య ఉన్మార్గప్రవృత్తినివారణం లోకసఙ్గ్రహః తమేవాపి ప్రయోజనం సమ్పశ్యన్ కర్తుమ్ అర్హసి ॥ ౨౦ ॥