ಅತೀತಾನೇಕಜನ್ಮವತ್ತ್ವಂ ಮಮೈವ ನಾಸಾಧಾರಣಂ, ಕಿಂತು ಸರ್ವಪ್ರಾಣಿಸಾಧಾರಣಮಿತ್ಯಾಹ -

ತವ ಚೇತಿ ।

ತಾನಿ ಪ್ರಮಾಣಾಭಾವಾನ್ನ ಪ್ರತಿಭಾಂತೀತ್ಯಾಶಂಕ್ಯಾಹ -

ತಾನೀತಿ ।

ಈಶ್ವರಸ್ಯಾನಾವೃತಜ್ಞಾನತ್ವಾದಿತ್ಯರ್ಥಃ ।

ಕಿಮಿತಿ ತರ್ಹಿ ತಾನಿ ಮಮ ನ ಪ್ರತೀಯಂತೇ ? ತವಾವೃತಜ್ಞಾನತ್ವಾದಿತ್ಯಾಹ -

ನ ತ್ವಮಿತಿ ।

ಪರಾನ್ ಪರಿಕಲ್ಪ್ಯ ತತ್ಪರಿಭವಾರ್ಥಂ ಪ್ರವೃತ್ತತ್ವಾತ್ ತವ ಜ್ಞಾನಾವರಣಂ ವಿಜ್ಞೇಯಮಿತ್ಯಾಹ -

ಪರಂತಪೇತಿ ।

ಅರ್ಜುನಸ್ಯ ಭಗವತಾ ಸಹಾತೀತಾನೇಕಜನ್ಮವತ್ತ್ವೇ ತುಲ್ಯೇಽಪಿ, ಜ್ಞಾನವೈಷಮ್ಯೇ ಹೇತುಮಾಹ -

ಧರ್ಮೇತಿ ।

ಆದಿಶಬ್ದೇನ ರಾಗಲೋಭಾದಯೋ ಗೃಹ್ಯಂತೇ ।

ಈಶ್ವರಸ್ಯಾತೀತಾನಾಗತವರ್ತಮಾನಸರ್ವಾರ್ಥವಿಷಯಜ್ಞಾನವತ್ತ್ವೇ ಹೇತುಮಾಹ -

ಅಹಮಿತಿ

॥ ೫ ॥