ಮಾಯಾಮಯಮೀಶ್ವರಸ್ಯ ಜನ್ಮ, ನ ವಾಸ್ತವಂ, ತಸ್ಯೈವ ಚ ಜಗತ್ಪರಿಪಾಲನಂ ಕರ್ಮ, ನಾನ್ಯಸ್ಯ, ಇತಿ ಜಾನತಃ ಶ್ರೇಯೋಽವಾಪ್ತಿಂದರ್ಶಯನ್ , ವಿಪಕ್ಷೇ ಪ್ರತ್ಯವಾಯಂ ಸೂಚಯತಿ -

ತಜ್ಜನ್ಮೇತ್ಯಾದಿನಾ ।

ಯಥೋಕ್ತಂ - ಮಾಯಾಮಯಂ, ಕಲ್ಪಿತಮಿತಿ ಯಾವತ್ । ವೇದನಸ್ಯ ಯಥಾವತ್ವಂ, ವೇದ್ಯಸ್ಯ ಜನ್ಮಾದೇರುಕ್ತರೂಪಾನತಿವರ್ತಿತ್ವಮ್ । ಯದಿ ಪುನರ್ಭಗವತೋ ವಾಸ್ತವಂ ಜನ್ಮ, ಸಾಧುಜನಪರಿಪಾಲನಾದಿ ಚಾನ್ಯಸ್ಯೈವ ಕರ್ಮ ಕ್ಷತ್ರಿಯಸ್ಯೇತಿ ವಿವಕ್ಷ್ಯತೇ, ತದಾ ತತ್ತ್ವಾಪರಿಜ್ಞಾನಾಪ್ರಯುಕ್ತೋ ಜನ್ಮಾದಿಃ ಸಂಸಾರೋ ದುರ್ವಾರಃ ಸ್ಯಾದಿತಿ ಭಾವಃ

॥ ೯ ॥