ಶ್ರೀಮದ್ಭಗವದ್ಗೀತಾಭಾಷ್ಯಮ್
ಚತುರ್ಥೋಽಧ್ಯಾಯಃ
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಗೀತಾಭಾಷ್ಯ)
 
ನ ಮಾಂ ಕರ್ಮಾಣಿ ಲಿಂಪಂತಿ ನ ಮೇ ಕರ್ಮಫಲೇ ಸ್ಪೃಹಾ ।
ಇತಿ ಮಾಂ ಯೋಽಭಿಜಾನಾತಿ ಕರ್ಮಭಿರ್ನ ಸ ಬಧ್ಯತೇ ॥ ೧೪ ॥
ನ ಮಾಂ ತಾನಿ ಕರ್ಮಾಣಿ ಲಿಂಪಂತಿ ದೇಹಾದ್ಯಾರಂಭಕತ್ವೇನ, ಅಹಂಕಾರಾಭಾವಾತ್ । ನ ಚ ತೇಷಾಂ ಕರ್ಮಣಾಂ ಫಲೇಷು ಮೇ ಮಮ ಸ್ಪೃಹಾ ತೃಷ್ಣಾ । ಯೇಷಾಂ ತು ಸಂಸಾರಿಣಾಮ್ ‘ಅಹಂ ಕರ್ತಾ’ ಇತ್ಯಭಿಮಾನಃ ಕರ್ಮಸು, ಸ್ಪೃಹಾ ತತ್ಫಲೇಷು ಚ, ತಾನ್ ಕರ್ಮಾಣಿ ಲಿಂಪಂತಿ ಇತಿ ಯುಕ್ತಮ್ , ತದಭಾವಾತ್ ನ ಮಾಂ ಕರ್ಮಾಣಿ ಲಿಂಪಂತಿ । ಇತಿ ಏವಂ ಯಃ ಅನ್ಯೋಽಪಿ ಮಾಮ್ ಆತ್ಮತ್ವೇನ ಅಭಿಜಾನಾತಿ ‘ನಾಹಂ ಕರ್ತಾ ನ ಮೇ ಕರ್ಮಫಲೇ ಸ್ಪೃಹಾ’ ಇತಿ ಸಃ ಕರ್ಮಭಿಃ ನ ಬಧ್ಯತೇ, ತಸ್ಯಾಪಿ ನ ದೇಹಾದ್ಯಾರಂಭಕಾಣಿ ಕರ್ಮಾಣಿ ಭವಂತಿ ಇತ್ಯರ್ಥಃ ॥ ೧೪ ॥
ನ ಮಾಂ ಕರ್ಮಾಣಿ ಲಿಂಪಂತಿ ನ ಮೇ ಕರ್ಮಫಲೇ ಸ್ಪೃಹಾ ।
ಇತಿ ಮಾಂ ಯೋಽಭಿಜಾನಾತಿ ಕರ್ಮಭಿರ್ನ ಸ ಬಧ್ಯತೇ ॥ ೧೪ ॥
ನ ಮಾಂ ತಾನಿ ಕರ್ಮಾಣಿ ಲಿಂಪಂತಿ ದೇಹಾದ್ಯಾರಂಭಕತ್ವೇನ, ಅಹಂಕಾರಾಭಾವಾತ್ । ನ ಚ ತೇಷಾಂ ಕರ್ಮಣಾಂ ಫಲೇಷು ಮೇ ಮಮ ಸ್ಪೃಹಾ ತೃಷ್ಣಾ । ಯೇಷಾಂ ತು ಸಂಸಾರಿಣಾಮ್ ‘ಅಹಂ ಕರ್ತಾ’ ಇತ್ಯಭಿಮಾನಃ ಕರ್ಮಸು, ಸ್ಪೃಹಾ ತತ್ಫಲೇಷು ಚ, ತಾನ್ ಕರ್ಮಾಣಿ ಲಿಂಪಂತಿ ಇತಿ ಯುಕ್ತಮ್ , ತದಭಾವಾತ್ ನ ಮಾಂ ಕರ್ಮಾಣಿ ಲಿಂಪಂತಿ । ಇತಿ ಏವಂ ಯಃ ಅನ್ಯೋಽಪಿ ಮಾಮ್ ಆತ್ಮತ್ವೇನ ಅಭಿಜಾನಾತಿ ‘ನಾಹಂ ಕರ್ತಾ ನ ಮೇ ಕರ್ಮಫಲೇ ಸ್ಪೃಹಾ’ ಇತಿ ಸಃ ಕರ್ಮಭಿಃ ನ ಬಧ್ಯತೇ, ತಸ್ಯಾಪಿ ನ ದೇಹಾದ್ಯಾರಂಭಕಾಣಿ ಕರ್ಮಾಣಿ ಭವಂತಿ ಇತ್ಯರ್ಥಃ ॥ ೧೪ ॥

ಕರ್ಮತತ್ಫಲಸಂಸ್ಪರ್ಶಶೂನ್ಯಮೀಶ್ವರಂ ಪಶ್ಯತೋ ದರ್ಶನಾನುರೂಪಂ ಫಲಂ ದರ್ಶಯತಿ -

ನ ಮಾಮಿತಿ ।

ತಾನಿ ಕರ್ಮಾಣೀತಿ ಯೇಷಾಂ ಕರ್ಮಣಾಮಹಂ ಕರ್ತಾ ತವಾಭಿಮತಃ, ತಾನೀತಿ ಯಾವತ್ ।

ದೇಹೇಂದ್ರಿಯಾದ್ಯಾರಂಭಕತ್ವೇನ ತೇಷಾಂ ಕರ್ಮಣಾಮೀಶ್ವರೇ ಸಂಸ್ಪರ್ಶಾಭಾವೇ, ತಸ್ಯ ತತ್ಕರಣಾವಸ್ಥಾಯಾಮಹಂಕಾರಾಭಾವಂ ಹೇತುಂ ಕರೋತಿ -

ಅಹಂಕಾರಾಭಾವಾದಿತಿ ।

ಕರ್ಮಫಲತೃಷ್ಣಾಭಾವಾಚ್ಚೇಶ್ವರಂ ಕರ್ಮಾಣಿ ನ ಲಿಂಪಂತಿ, ಇತ್ಯಾಹ-

ನಚೇತಿ ।

ಉಕ್ತಮೇವ ಪ್ರಪಂಚಯತಿ -

ಯೇಷಾಂ ತ್ವಿತಿ ।

ತದಭಾವಾತ್ -ಕರ್ಮಸು ‘ಅಹಂ ಕರ್ತಾ’ ಇತ್ಯಭಿಮಾನಸ್ಯ, ತತ್ಫಲೇಷು ಸ್ಪೃಹಾಯಾಶ್ಚಾಭಾವಾದಿತ್ಯರ್ಥಃ ।

ಈಶ್ವರಸ್ಯ ಕರ್ಮನಿರ್ಲೇಪೇಽಪಿ, ಕ್ಷೇತ್ರಜ್ಞಸ್ಯ ಕಿಮಾಯಾತಮ್ ? ಇತ್ಯಾಶಂಕ್ಯ, ಉತ್ತರಾರ್ಧಂ ವ್ಯಾಚಷ್ಟೇ -

ಇತ್ಯೇವಮಿತಿ ।

ಅಭಿಜ್ಞಾನಪ್ರಕಾರಮಭಿನಯತಿ -

ನಾಹಮಿತಿ ।

ಜ್ಞಾನಫಲಂ ಕಥಯತಿ -

ಸ ಕರ್ಮಭಿರಿತಿ ।

ಕರ್ಮಾಸಂಬಂಧಂ ವಿದುಷಿ ವಿಶದಯತಿ -

ತಸ್ಯಾಪೀತಿ

॥ ೧೪ ॥