తస్మాదిత్యుక్తమేవ స్ఫుటయతి -
పూర్వైరితి ।
యదుక్తం కిం మమ కర్మణేతి, తత్ర త్వమజ్ఞో వా, తత్త్వవిద్వా ? । యద్యజ్ఞః, తదా చిత్తశుద్ధ్యర్థం కురు కర్మ ఇత్యాహ -
యదీతి ।
ద్వితీయం ప్రత్యాహ -
తత్త్వవిదితి ।
కురు కర్మేతి సమ్బన్ధః ।
పూర్వైర్మూఢైరాచరితమిత్యేతావతా కిమితి వివేకవతా మయా తత్కర్తవ్యమ్ ? ఇత్యాశఙ్క్యాహ -
జనకాదిభిరితి ।
తే తావత్ ఎవం సమ్పాద్య కర్మ కృతవన్తో, న తదిదానీమప్రామాణికత్వాదనుష్ఠేయమ్ , ఇత్యాశఙ్క్యాహ -
పూర్వతరమితి
॥ ౧౫ ॥