अद्वैतशारदा | दक्षिणाम्नाय श्रीशारदापीठम्, शृङ्गेरी

కాయేన మనసా బుద్ధ్యా కేవలైరిన్ద్రియైరపి ।
యోగినః కర్మ కుర్వన్తి సఙ్గం త్యక్త్వాత్మశుద్ధయే ॥ ౧౧ ॥

కాయేన దేహేన మనసా బుద్ధ్యా చ కేవలైః మమత్వవర్జితైః ‘ఈశ్వరాయైవ కర్మ కరోమి, న మమ ఫలాయ’ ఇతి మమత్వబుద్ధిశూన్యైః ఇన్ద్రియైరపి — కేవలశబ్దః కాయాదిభిరపి ప్రత్యేకం సమ్బధ్యతే — సర్వవ్యాపారేషు మమతావర్జనాయ । యోగినః కర్మిణః కర్మ కుర్వన్తి సఙ్గం త్యక్త్వా ఫలవిషయమ్ ఆత్మశుద్ధయే సత్త్వశుద్ధయే ఇత్యర్థః । తస్మాత్ తత్రైవ తవ అధికారః ఇతి కురు కర్మైవ ॥ ౧౧ ॥

సర్వవ్యాపారేష్వితి ; తస్మాదితి ;

కేవలశబ్దస్య ప్రత్యేకం సమ్బన్ధే ప్రయోజనమ్ ఆహ -

సర్వవ్యాపారేష్వితి ।

కర్మణః చిత్తశుద్ధిఫలత్వే తాదర్థ్యేన కర్మానుష్ఠానమేవ తవ కర్తవ్యమితి, యస్మాదిత్యస్యాపేక్షితం వదన్ ఫలితమ్ ఆహ -

తస్మాదితి

॥ ౧౧ ॥