ನನು ಹರ್ಷವಿಷಾದನಿಮಿತ್ತತ್ವಂ ಪ್ರಿಯಾಪ್ರಿಯಯೋಃ ಸಿದ್ಧಮ್ , ಇತಿ ಕಥಂ ತತ್ಪ್ರಾಪ್ತ್ಯಾ ಹರ್ಷೋದ್ವೇಗೌ ನ ಕರ್ತವ್ಯೌ ? ಇತಿ ನಿಯುಜ್ಯತೇ, ತತ್ರಾಹ -

ದೇಹೇತಿ ।

ವಿದುಷೋಽಪಿ ಪ್ರಿಯಾಪ್ರಿಯಪ್ರಾಪ್ತಿಸಾಮರ್ಥ್ಯಾದೇವ ಹರ್ಷವಿಷಾದೌ ದುರ್ವಾರೌ, ಇತ್ಯಾಶಂಕ್ಯ, ಆಹ -

ನ ಕೇವಲೇತಿ ।

ಅದ್ವಿತೀಯಾತ್ಮದರ್ಶನಶೀಲಸ್ಯ ವ್ಯತಿರಿಕ್ತಪ್ರಿಯಾಪ್ರಿಯಪ್ರಾಪ್ತ್ಯಯೋಗಾತ್ ನ ತನ್ನಿಮಿತ್ತೌ ಹರ್ಷವಿಷಾದೌ ಇತ್ಯರ್ಥಃ ।

ಇತೋಽಪಿ ವಿದುಷೋ ಹರ್ಷವಿಷಾದಾವಸಂಭಾವಿತೌ ಇತ್ಯಾಹ -

ಕಿಂಚೇತಿ ।

ನಿರ್ದೋಷೇ ಬ್ರಹ್ಮಣಿ ಪ್ರಾಗುಕ್ತೇ ದೃಢಪ್ರತಿಪತ್ತಿಃ, ಸಂಮೋಹೇನ ಹರ್ಷಾದಿಹೇತುನಾ ರಹಿತಃ, ಯಥೋಕ್ತೇ ಸರ್ವದೋಷರಹಿತೇ ಬ್ರಹ್ಮಣಿ ‘ಅಹಂ ಅಸ್ಮಿ’ ಇತಿ ವಿದ್ಯಾವಾನ್ , ಅಶೇಷದೋಷಶೂನ್ಯೇ ತಸ್ಮಿನ್ನೇವ ಬ್ರಹ್ಮಣಿ ಸ್ಥಿತಃ ತದನುರೋಧಾತ್ ಕರ್ಮಾಣಿ ಅಮೃಷ್ಯಮಾಣಃ ನೈವ ಹರ್ಷವಿಷಾದಭಾಗೀ ಭವಿತುಮಲಮಿತ್ಯರ್ಥಃ ॥ ೨೦ ॥