యావద్యావత్ విషయేషు రాగరూపమావరణం నివర్తతే, తావత్తావత్ ఆత్మస్వరూపసుఖమభివ్యక్తం భవతి, ఇత్యాహ -

బాహ్యేతి ।

న కేవలమ్ అసక్తాత్మా శమవశాదేవ సుఖం విన్దతే, కిన్తు బ్రహ్మసమాధినా సమాహితాన్తఃకరణః సుఖమనన్తం ప్రాప్నోతి, ఇత్యాహ -

స బ్రహ్మేతి ।

తత్ర పూర్వార్ధం వ్యాచష్టే -

బాహ్యాశ్చేతి ।

సమాధిసమ్యగ్జ్ఞానద్వారా నిరతిశయసుఖప్రాప్తిముత్తరార్ధవ్యాఖ్యానేన కథయతి -

బ్రహ్యణీత్యాదినా ।

శబ్దాదివిషయవిముఖస్య అనన్తసుఖాప్తిసమ్భవాత్ తదర్థినా, ప్రయత్నేన విషయవైముఖ్యం కర్తవ్యమ్ , ఇతి శిష్యశిక్షార్థమ్ ఆహ -

తస్మాదితి

॥ ౨౧ ॥