कथं संयतकार्यकरणस्य बन्धुरात्मा ? इति, तत्र आह -
जितात्मन इति ।
जितकार्यकरणसङ्घातस्य प्रकर्षेण उपरतबाह्याभ्यन्तरकरणस्य परमात्मा विक्षेपेण पुनः पुनः अनभिभूयमानो निरन्तरं चित्ते प्रथते, इत्यर्थः ।
जितात्मानं संन्यस्तसमस्तकर्माणम् अधिकारिणं प्रदर्श्य, योगाङ्गानि दर्शयति -
शीतेति ।
समः स्यात् , इति अध्याहारः ।
पूर्वार्धं व्याचष्टे -
जितेत्यादिना ।
न केवलं तस्य परमात्मा साक्षात् आत्मभावेन वर्तते, किन्तु शीतोष्णादिभिरपि नासौ चाल्यते तत्वज्ञानात् , इति उत्तरार्धं विभजते -
किञ्चेति ।
तेषु, समः स्यात् इति सम्बन्धः
॥ ७ ॥