अद्वैतशारदा | दक्षिणाम्नाय श्रीशारदापीठम्, शृङ्गेरी

ಜ್ಞಾನವಿಜ್ಞಾನತೃಪ್ತಾತ್ಮಾ ಕೂಟಸ್ಥೋ ವಿಜಿತೇಂದ್ರಿಯಃ ।
ಯುಕ್ತ ಇತ್ಯುಚ್ಯತೇ ಯೋಗೀ ಸಮಲೋಷ್ಟಾಶ್ಮಕಾಂಚನಃ ॥ ೮ ॥

ಜ್ಞಾನವಿಜ್ಞಾನತೃಪ್ತಾತ್ಮಾ ಜ್ಞಾನಂ ಶಾಸ್ತ್ರೋಕ್ತಪದಾರ್ಥಾನಾಂ ಪರಿಜ್ಞಾನಮ್ , ವಿಜ್ಞಾನಂ ತು ಶಾಸ್ತ್ರತೋ ಜ್ಞಾತಾನಾಂ ತಥೈವ ಸ್ವಾನುಭವಕರಣಮ್ , ತಾಭ್ಯಾಂ ಜ್ಞಾನವಿಜ್ಞಾನಾಭ್ಯಾಂ ತೃಪ್ತಃ ಸಂಜಾತಾಲಂಪ್ರತ್ಯಯಃ ಆತ್ಮಾ ಅಂತಃಕರಣಂ ಯಸ್ಯ ಸಃ ಜ್ಞಾನವಿಜ್ಞಾನತೃಪ್ತಾತ್ಮಾ, ಕೂಟಸ್ಥಃ ಅಪ್ರಕಂಪ್ಯಃ, ಭವತಿ ಇತ್ಯರ್ಥಃ ; ವಿಜಿತೇಂದ್ರಿಯಶ್ಚ । ಯ ಈದೃಶಃ, ಯುಕ್ತಃ ಸಮಾಹಿತಃ ಇತಿ ಸ ಉಚ್ಯತೇ ಕಥ್ಯತೇ । ಸ ಯೋಗೀ ಸಮಲೋಷ್ಟಾಶ್ಮಕಾಂಚನಃ ಲೋಷ್ಟಾಶ್ಮಕಾಂಚನಾನಿ ಸಮಾನಿ ಯಸ್ಯ ಸಃ ಸಮಲೋಷ್ಟಾಶ್ಮಕಾಂಚನಃ ॥ ೮ ॥

ಜ್ಞಾನೇತಿ ; ಜ್ಞಾನಮಿತ್ಯಾದಿನಾ ; ಸ ಯೋಗೀತಿ ;

ಚಿತ್ತಸಮಾಧಾನಮೇವ ವಿಶಿಷ್ಟಫಲಂ ಚೇತ್ ಇಷ್ಟಮ್ , ತರ್ಹಿ ಕಥಂಭೂತಃ ಸಮಾಹಿತೋ ವ್ಯವಹ್ರಿಯತೇ, ತತ್ರ ಆಹ -

ಜ್ಞಾನೇತಿ ।

ಪರೋಕ್ಷಾಪರೋಕ್ಷಾಭ್ಯಾಂ ಜ್ಞಾನವಿಜ್ಞಾನಾಭ್ಯಾಂ ಸಂಜಾತಃ ಅಲಂಪ್ರತ್ಯಯಃ ಯಸ್ಯ ಅಂತಃಕರಣೇ, ಸೋಽಕ್ರಿಯೋ ಹರ್ಷವಿಷಾದಕಾಮಕ್ರೋಧಾದಿರಹಿತೋ ಯೋಗೀ, ಯುಕ್ತಃ, ಸಮಾಹಿತ ಇತಿ ವ್ಯವಹಾರಭಾಗೀ ಭವತಿ, ಇತಿ ಪದತ್ರಯವ್ಯಾಖ್ಯಾನೇನ ದರ್ಶಯತಿ -

ಜ್ಞಾನಮಿತ್ಯಾದಿನಾ ।

ಸ ಚ ಯೋಗೀ ಪರಮಹಂಸಪರಿವ್ರಾಜಕಃ ಸರ್ವತ್ರ ಉಪೇಕ್ಷಾಬುದ್ಧಿಃ ಅನತಿಶಯವೈರಾಗ್ಯಭಾಗೀ, ಇತಿ ಕಥಯತಿ -

ಸ ಯೋಗೀತಿ

॥ ೮ ॥