अद्वैतशारदा | दक्षिणाम्नाय श्रीशारदापीठम्, शृङ्गेरी

ಸುಹೃನ್ಮಿತ್ರಾರ್ಯುದಾಸೀನಮಧ್ಯಸ್ಥದ್ವೇಷ್ಯಬಂಧುಷು ।
ಸಾಧುಷ್ವಪಿ ಚ ಪಾಪೇಷು ಸಮಬುದ್ಧಿರ್ವಿಶಿಷ್ಯತೇ ॥ ೯ ॥

‘ಸುಹೃತ್’ ಇತ್ಯಾದಿಶ್ಲೋಕಾರ್ಧಮ್ ಏಕಂ ಪದಮ್ । ಸುಹೃತ್ ಇತಿ ಪ್ರತ್ಯುಪಕಾರಮನಪೇಕ್ಷ್ಯ ಉಪಕರ್ತಾ, ಮಿತ್ರಂ ಸ್ನೇಹವಾನ್ , ಅರಿಃ ಶತ್ರುಃ, ಉದಾಸೀನಃ ನ ಕಸ್ಯಚಿತ್ ಪಕ್ಷಂ ಭಜತೇ, ಮಧ್ಯಸ್ಥಃ ಯೋ ವಿರುದ್ಧಯೋಃ ಉಭಯೋಃ ಹಿತೈಷೀ, ದ್ವೇಷ್ಯಃ ಆತ್ಮನಃ ಅಪ್ರಿಯಃ, ಬಂಧುಃ ಸಂಬಂಧೀ ಇತ್ಯೇತೇಷು ಸಾಧುಷು ಶಾಸ್ತ್ರಾನುವರ್ತಿಷು ಅಪಿ ಚ ಪಾಪೇಷು ಪ್ರತಿಷಿದ್ಧಕಾರಿಷು ಸರ್ವೇಷು ಏತೇಷು ಸಮಬುದ್ಧಿಃ ‘ಕಃ ಕಿಂಕರ್ಮಾ’ ಇತ್ಯವ್ಯಾಪೃತಬುದ್ಧಿರಿತ್ಯರ್ಥಃ । ವಿಶಿಷ್ಯತೇ, ‘ವಿಮುಚ್ಯತೇ’ ಇತಿ ವಾ ಪಾಠಾಂತರಮ್ । ಯೋಗಾರೂಢಾನಾಂ ಸರ್ವೇಷಾಮ್ ಅಯಮ್ ಉತ್ತಮ ಇತ್ಯರ್ಥಃ ॥ ೯ ॥

ಸುಹೃದಿತೀತಿ ; ಕಃ ಕಿಮಿತಿ ; ವಿಶಿಷ್ಯತ ಇತಿ ; ಯೋಗಾರೂಢಾನಾಮಿತಿ ;

ಪದಚ್ಛೇದಃ ಪದಾರ್ಥೋಕ್ತಿಃ ಇತಿ ವ್ಯಾಖ್ಯಾನಾಂಗಂ ಸಂಪಾದಯತಿ -

ಸುಹೃದಿತೀತಿ ।

ಅರಿರ್ನಾಮ ಪರೋಕ್ಷಮ್ ಅಪಕಾರಕಃ, ಪ್ರತ್ಯಕ್ಷಮ್ ಅಪ್ರಿಯೋ ದ್ವೇಷ್ಯಃ, ಇತಿ ವಿಭಾಗಃ । ಸಮಬುದ್ಧಿಃ ಇತಿ ವ್ಯಾಚಷ್ಟೇ -

ಕಃ ಕಿಮಿತಿ ।

ಪ್ರಥಮೋ ಹಿ ಪ್ರಶ್ನೋ ಜಾತಿಗೋತ್ರಾದಿವಿಷಯಃ, ದ್ವಿತೀಯೋ ವ್ಯಾಪಾರವಿಷಯಃ । ಉಕ್ತಪ್ರಕಾರೇಣ ಅವ್ಯಾಪೃತಬುದ್ಧಿತ್ವೇ ಸರ್ವೋತ್ಕರ್ಷೋ ವಾ ಸರ್ವಪಾಪವಿಮೋಕ್ಷೋ ವಾ ಸಿಧ್ಯತಿ, ಇತ್ಯಾಹ -

ವಿಶಿಷ್ಯತ ಇತಿ ।

ಪಾಠದ್ವಯೇಽಪಿ ಸಿದ್ಧಮ್ ಅರ್ಥಂ ಸಂಗೃಹ್ಯ ಕಥಯತಿ -

ಯೋಗಾರೂಢಾನಾಮಿತಿ

॥ ೯ ॥