अद्वैतशारदा | दक्षिणाम्नाय श्रीशारदापीठम्, शृङ्गेरी

సర్వభూతస్థమాత్మానం సర్వభూతాని చాత్మని ।
ఈక్షతే యోగయుక్తాత్మా సర్వత్ర సమదర్శనః ॥ ౨౯ ॥

సర్వభూతస్థం సర్వేషు భూతేషు స్థితం స్వమ్ ఆత్మానం సర్వభూతాని చ ఆత్మని బ్రహ్మాదీని స్తమ్బపర్యన్తాని చ సర్వభూతాని ఆత్మని ఎకతాం గతాని ఈక్షతే పశ్యతి యోగయుక్తాత్మా సమాహితాన్తఃకరణః సర్వత్ర సమదర్శనః సర్వేషు బ్రహ్మాదిస్థావరాన్తేషు విషమేషు సర్వభూతేషు సమం నిర్విశేషం బ్రహ్మాత్మైకత్వవిషయం దర్శనం జ్ఞానం యస్య స సర్వత్ర సమదర్శనః ॥ ౨౯ ॥

సర్వభూతానీతి ; యోగేతి ; సర్వత్రేతి ;

సర్వభూతాన్యపి తద్విశేషణత్వేన పశ్యతి చేత్ న శుద్ధవస్తుజ్ఞానమితి న అవిద్యానివృత్తిః, ఇత్యాశఙ్క్య, ఆహ -

సర్వభూతానీతి ।

ఉక్తే దర్శనే చిత్తసమాధానమ్ ఉపాయన్దర్శయతి -

యోగేతి ।

విషమేషు ఉపాధిషు తదనురోధాత్ విషమమేవ దర్శనం తదుపదర్శితదర్శనప్రతిబన్ధకం ప్రత్యుదస్యతి -

సర్వత్రేతి

॥ ౨౯ ॥