ತತ್ರ ಏಕತ್ವದರ್ಶನಮ್ ಅನುವದತಿ -
ಯೋ ಮಾಮಿತಿ ।
ತತ್ಫಲಮ್ ಇದಾನೀಮ್ ಉಪನ್ಯಸ್ಯತಿ -
ತಸ್ಯೇತಿ ।
ಜ್ಞಾನಾನುವಾದಭಾಗಂ ವಿಭಜತೇ -
ಯೋ ಮಾಮಿತಿ ।
ತತ್ಫಲೋಕ್ತಿಭಾಗಂ ವ್ಯಾಚಷ್ಟೇ -
ತಸ್ಯೈವಮಿತಿ ।
ಅನೇಕತ್ವದರ್ಶಿನೋಽಪಿ ಈಶ್ವರೋ ನಿತ್ಯತ್ವಾತ್ ನ ಪ್ರಣಶ್ಯತಿ, ಇತ್ಯಾಶಂಕ್ಯ ಆಹ -
ನೇತಿ ।
ಅಹಮ್ ಪರಮಾನಂದಃ, ನ ತಂ ಪ್ರತಿ ಪರೋಕ್ಷೋ ಭವಾಮಿ, ಇತ್ಯರ್ಥಃ ।
‘ಸ ಚ’ ಇತ್ಯಾದಿ ವ್ಯಾಚಷ್ಟೇ -
ವಿದ್ವಾನಿತಿ ।
ವಿದ್ವಾನಿವ ಅವಿದ್ವಾನಪಿ ಈಶ್ವರಸ್ಯ ನ ನಶ್ಯತಿ, ಇತ್ಯಾಶಂಕ್ಯ, ಉಕ್ತಮ್ -
ನೇತ್ಯಾದಿನಾ ।
ಅವಿದುಷಶ್ಚ ಸ್ವರೂಪೇಣ ಸತೋಽಪಿ ವ್ಯವಹಿತತ್ವಾತ್ ಅವಿದ್ಯಯಾ, ನಷ್ಟಪ್ರಾಯತಾ ಇತ್ಯರ್ಥಃ ।
ಈಶ್ವರಸ್ಯ ವಿದುಷಶ್ಚ ಪರಸ್ಪರಮ್ ಅಪರೋಕ್ಷತ್ವೇ ಹೇತುಮ್ ಆಹ -
ತಸ್ಯ ಚೇತಿ ।
ಆತ್ಮೈಕತ್ವೇಽಪಿ ಕಥಂ ಮಿಥೋಽಪರೋಕ್ಷತ್ವಮ್ , ತತ್ರ ಆಹ -
ಸ್ವಾತ್ಮೇತಿ ।
ವಿದ್ವದೀಶ್ವರಯೋಃ ಏಕತ್ವಾನುವಾದೇನ ವಿದ್ಯಾಫಲಂ ವಿವೃಣೋತಿ -
ಯಸ್ಮಾಚ್ಚೇತಿ ।
ತಸ್ಮಾತ್ ಏಕತ್ವದರ್ಶನಾರ್ಥಂ ಪ್ರಯತಿತವ್ಯಮ್ , ಇತಿ ಶೇಷಃ
॥ ೩೦ ॥