కుత్ర సంశయరాహిత్యమ్ ? తత్ర ఆహ -
మన ఇతి ।
కథం తర్హి మనోనిరోధో భవతి, తత్ర ఆహ -
కిన్తు ఇతి ।
అభ్యాసస్వరూపం సామాన్యేన నిదర్శయతి -
అభ్యాసో నామేతి ।
కస్యాఞ్చిత్ చిత్తభూమౌ ఇతి అవిశేషితః ధ్యేయో విషయో నిర్దిశ్యతే, సమానప్రత్యయావృత్తిః విజాతీయప్రత్యయానన్తరితా ఇతి శేషః । చిత్తస్యేతి షష్ఠీ ప్రత్యయస్య తద్వికారత్వద్యోతనార్థా ।
వైరాగ్యస్వరూపం నిరూపయతి -
వైరాగ్యమితి ।
తేషు వైతృష్ణ్యం వైరాగ్యం నామ, ఇతి సమ్బన్ధః ।
తత్ర హేతుం సూచయతి -
దోషేతి ।
విషయేషుతృష్ణావిషయేషు దోషదర్శనమ్ అభ్యస్యతే । తేన వైతృష్ణ్యం జాయతే ।
తేన నిగృహ్యమాణం నిర్దిశతి -
విక్షేపేతి ।
తస్మిన్ గృహీతే - నిరుద్ధే మనోనిరోధేఽస్య కిం స్యాత్ ? ఇత్యపేక్షాయామ్ ఆహ -
ఎవమితి ।
అభ్యాసహేతుకవైరాగ్యద్వారా చిత్తప్రచారనిరోధే నిరుద్ధవృత్తికం మనోవిషయవిముఖమ్ అన్తర్నిష్ఠం భవతి, ఇత్యర్థః
॥ ౩౫ ॥