ಶ್ರೀಮದ್ಭಗವದ್ಗೀತಾಭಾಷ್ಯಮ್
ಷಷ್ಠೋಽಧ್ಯಾಯಃ
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಗೀತಾಭಾಷ್ಯ)
 
ಶ್ರೀಭಗವಾನುವಾಚ —
ಪಾರ್ಥ ನೈವೇಹ ನಾಮುತ್ರ ವಿನಾಶಸ್ತಸ್ಯ ವಿದ್ಯತೇ ।
ನ ಹಿ ಕಲ್ಯಾಣಕೃತ್ಕಶ್ಚಿದ್ದುರ್ಗತಿಂ ತಾತ ಗಚ್ಛತಿ ॥ ೪೦ ॥
ಹೇ ಪಾರ್ಥ ನೈವ ಇಹ ಲೋಕೇ ನಾಮುತ್ರ ಪರಸ್ಮಿನ್ ವಾ ಲೋಕೇ ವಿನಾಶಃ ತಸ್ಯ ವಿದ್ಯತೇ ನಾಸ್ತಿ । ನಾಶೋ ನಾಮ ಪೂರ್ವಸ್ಮಾತ್ ಹೀನಜನ್ಮಪ್ರಾಪ್ತಿಃ ಸ ಯೋಗಭ್ರಷ್ಟಸ್ಯ ನಾಸ್ತಿ । ನ ಹಿ ಯಸ್ಮಾತ್ ಕಲ್ಯಾಣಕೃತ್ ಶುಭಕೃತ್ ಕಶ್ಚಿತ್ ದುರ್ಗತಿಂ ಕುತ್ಸಿತಾಂ ಗತಿಂ ಹೇ ತಾತ, ತನೋತಿ ಆತ್ಮಾನಂ ಪುತ್ರರೂಪೇಣೇತಿ ಪಿತಾ ತಾತ ಉಚ್ಯತೇ । ಪಿತೈವ ಪುತ್ರ ಇತಿ ಪುತ್ರೋಽಪಿ ತಾತ ಉಚ್ಯತೇ । ಶಿಷ್ಯೋಽಪಿ ಪುತ್ರ ಉಚ್ಯತೇ । ಯತೋ ನ ಗಚ್ಛತಿ ॥ ೪೦ ॥
ಶ್ರೀಭಗವಾನುವಾಚ —
ಪಾರ್ಥ ನೈವೇಹ ನಾಮುತ್ರ ವಿನಾಶಸ್ತಸ್ಯ ವಿದ್ಯತೇ ।
ನ ಹಿ ಕಲ್ಯಾಣಕೃತ್ಕಶ್ಚಿದ್ದುರ್ಗತಿಂ ತಾತ ಗಚ್ಛತಿ ॥ ೪೦ ॥
ಹೇ ಪಾರ್ಥ ನೈವ ಇಹ ಲೋಕೇ ನಾಮುತ್ರ ಪರಸ್ಮಿನ್ ವಾ ಲೋಕೇ ವಿನಾಶಃ ತಸ್ಯ ವಿದ್ಯತೇ ನಾಸ್ತಿ । ನಾಶೋ ನಾಮ ಪೂರ್ವಸ್ಮಾತ್ ಹೀನಜನ್ಮಪ್ರಾಪ್ತಿಃ ಸ ಯೋಗಭ್ರಷ್ಟಸ್ಯ ನಾಸ್ತಿ । ನ ಹಿ ಯಸ್ಮಾತ್ ಕಲ್ಯಾಣಕೃತ್ ಶುಭಕೃತ್ ಕಶ್ಚಿತ್ ದುರ್ಗತಿಂ ಕುತ್ಸಿತಾಂ ಗತಿಂ ಹೇ ತಾತ, ತನೋತಿ ಆತ್ಮಾನಂ ಪುತ್ರರೂಪೇಣೇತಿ ಪಿತಾ ತಾತ ಉಚ್ಯತೇ । ಪಿತೈವ ಪುತ್ರ ಇತಿ ಪುತ್ರೋಽಪಿ ತಾತ ಉಚ್ಯತೇ । ಶಿಷ್ಯೋಽಪಿ ಪುತ್ರ ಉಚ್ಯತೇ । ಯತೋ ನ ಗಚ್ಛತಿ ॥ ೪೦ ॥

ಯೋಗಿನೋ ನಾಶಾಶಂಕಾಂ ಪರಿಹರನ್ ಉತ್ತರಮ್ ಆಹ - 

ಭಗವಾನಿತಿ ।

ಯದುಕ್ತಮ್ ಉಭಯಭ್ರಷ್ಟೋ ಯೋಗೀ ನಶ್ಯತಿ, ಇತಿ, ತತ್ರ ಆಹ -

ಪಾರ್ಥೇತಿ ।

ತತ್ರ ಹೇತುಮ್ ಆಹ -

ನಹೀತಿ ।

ಯೋಗಿನೋ ಮಾರ್ಗದ್ವಯಾತ್ ವಿಭ್ರಷ್ಟಸ್ಯ ಐಹಿಕೋ ನಾಶಃ - ಶಿಷ್ಟಗರ್ಹಾಲಕ್ಷಣೋ ನ ಭವತೀತಿ ಶ್ರದ್ಧಾದೇಃ ಸದ್ಭಾವಾತ್ , ತಥಾಪಿ ಕಥಮ್ ಆಮುಷ್ಮಿಕನಾಶಶೂನ್ಯತ್ವಮ್ ? ಇತ್ಯಾಶಂಕ್ಯ, ತದ್ರೂಪನಿರೂಪಣಪೂರ್ವಕಂ ತದಭಾವಂ ಪ್ರತಿಜಾನೀತೇ -

ನಾಶೋ ನಾಮೇತಿ ।

ತತ್ರ ಹೇತುಭಾಗಂ ವಿಭಜತೇ -

ನಹೀತ್ಯಾದಿನಾ ।

ಉಭಯಭ್ರಷ್ಟಸ್ಯಾಪಿ ಶ್ರದ್ಧೇಂದ್ರಿಯಸಂಯಮಾದೇಃ ಸಾಮಿಕೃತಶ್ರವಣಾದೇಶ್ಚ ಭಾವಾತ್ ಉಪಪನ್ನಂ ಶುಭಕೃತ್ತ್ವಮ್ ।

ತಾತೇತಿ ಕಥಂ ಪುತ್ರಸ್ಥಾನೀಯಶಿಷ್ಯಃ ಸಂಬೋಧ್ಯತೇ ? ಪಿತುರೇವ ತಾತಶಬ್ದತ್ವಾತ್ , ಇತ್ಯಾಶಂಕ್ಯ, ಆಹ -

ತನೋತೀತಿ ।

ತೇನ ಪುತ್ರಸ್ಥಾನೀಯಸ್ಯ ಶಿಷ್ಯಸ್ಯ ತಾತೇತಿ ಸಂಬೋಧನಮ್ ಅವಿರುದ್ಧಮ್ , ಇತ್ಯರ್ಥಃ । ನ ಗಚ್ಛತಿ ಕುತ್ಸಿತಾಂ ಗತಿಮ್ , ಕಲ್ಯಾಣಕಾರಿತ್ವಾತ್ , ಇತಿ ನಾಶಾಭಾವಃ

॥ ೪೦ ॥