श्रद्धावैराग्यादिकल्याणाधिक्ये पक्षान्तरम् आह -

अथेति ।

योगिनामिति कर्मिणां ग्रहणं मा भूत्  , इति विशिनष्टि -

धीमतामिति ।

ब्रह्मविद्यावतां शुचीनां दरिद्राणां कुलेजन्म दुर्लभादपि दुर्लभं प्रमादकारणाभावात् , इत्याह -

एतद्धीति ।

किमपेक्ष्य अस्य जन्मनो दुःखलभ्यादपि दुःखलभ्यतरत्वम् ? तदाह -

पूर्वमिति ।

यद्यपि विभूतिमतामपि शुचीनां गृहे जन्म दुःखलभ्यम् , तथापि तदपेक्षया इदं जन्म दुःखलभ्यतरम् , यत् ईदृशं शुचीनां दरिद्राणां विद्यावताम् , इति विशेषणोपेते कुले लोके जन्म वक्ष्यमाणम् , इत्यर्थः

॥ ४२ ॥