ಸರ್ವೇಷಾಂ ಭಗವದಭಿಮುಖತ್ವಾತ್ ಉತ್ಕರ್ಷೇಽಪಿ ಜ್ಞಾನಿನಿ ತದತಿರೇಕಮ್ ಅಂಗೀಕೃತ್ಯ ವಿಶೇಷಣಮ್ , ಇ್ತ್ಯಾಹ -

ಉದಾರಾ ಇತಿ ।

ಕಿಂ ತತ್ರ ಪ್ರಮಾಣಮ್ ? ಇತ್ಯಾಶಂಕ್ಯ, ಈಶ್ವರಜ್ಞಾನಮ್ , ಇತ್ಯಾಹ -

ಮೇ ಮತಮಿತಿ ।

ಜ್ಞಾನೀ ತು ಆತ್ಮೈವ ಇತ್ಯತ್ರ ಹೇತುಮ್ ಆಹ -

ಆಸ್ಥಿತ ಇತಿ ।

ಸರ್ವಶಬ್ದಸ್ಯ ಜ್ಞಾನಿವ್ಯತಿರಿಕ್ತವಿಷಯತ್ವಮ್ ಆಹ -

ತ್ರಯೋಽಪೀತಿ ।

ಜ್ಞಾನಿವ್ಯತಿರಿಕ್ತಾನಾಂ ಭಗವದಭಿಮುಖತ್ವೇಽಪಿ ಜ್ಞಾನಾಭಾವಾಪರಾಧಾತ್ ನ ಭಗವತ್ಪ್ರೀತಿವಿಷಯತಾ, ಇತ್ಯಾಶಂಕ್ಯ, ಆಹ -

ನ ಹೀತಿ ।

ಕಸ್ತರ್ಹಿ ಜ್ಞಾನವತಿ ವಿಶೇಷಃ । ತತ್ರ ಆಹ -

ಜ್ಞಾನೀ ತ್ವಿತಿ ।

ತಮೇವ ವಿಶೇಷಂ ಪ್ರಶ್ನಪೂರ್ವಕಂ ಪ್ರಕಟಯತಿ -

ತತ್ಕಸ್ಮಾದಿತ್ಯಾದಿನಾ ।

ಸರ್ವಮಾತ್ಮಾನಂ ಪಶ್ಯತೋಽಪಿ ತಸ್ಯ ತವ ಕಥಂ ಯಥೋಕ್ತೋ ನಿಶ್ಚಯಃ ಸ್ಯಾತ್ ? ಇತ್ಯಾಶಂಕ್ಯ, ಆಸ್ಥಿತ ಇತ್ಯೇತತ್ ವ್ಯಾಕರೋತಿ -

ಆರೋಢುಮಿತಿ ।

ಆರೋಹೇ ಹೇತುಂ ಸೂಚಯತಿ -

ಸ ಜ್ಞಾನೀತಿ ।

ಆರೋಢುಂ ಪ್ರವೃತ್ತತ್ವಮೇವ ಸ್ಫುಟಯತಿ -

ಮಾಮೇವೇತಿ

॥ ೧೮ ॥