अद्वैतशारदा | दक्षिणाम्नाय श्रीशारदापीठम्, शृङ्गेरी

న చ మాం తాని కర్మాణి నిబధ్నన్తి ధనఞ్జయ ।
ఉదాసీనవదాసీనమసక్తం తేషు కర్మసు ॥ ౯ ॥

న చ మామ్ ఈశ్వరం తాని భూతగ్రామస్య విషమసర్గనిమిత్తాని కర్మాణి నిబధ్నన్తి ధనఞ్జయ । తత్ర కర్మణాం అసమ్బన్ధిత్వే కారణమాహ — ఉదాసీనవత్ ఆసీనం యథా ఉదాసీనః ఉపేక్షకః కశ్చిత్ తద్వత్ ఆసీనమ్ , ఆత్మనః అవిక్రియత్వాత్ , అసక్తం ఫలాసఙ్గరహితమ్ , అభిమానవర్జితమ్ ‘అహం కరోమి’ ఇతి తేషు కర్మసు । అతః అన్యస్యాపి కర్తృత్వాభిమానాభావః ఫలాసఙ్గాభావశ్చ అసమ్బన్ధకారణమ్ , అన్యథా కర్మభిః బధ్యతే మూఢః కోశకారవత్ ఇత్యభిప్రాయః ॥ ౯ ॥

అతోఽన్యస్యేతి ; అన్యథేతి ;

‘తత్ర’ ఇతి సప్తమ్యా పరమేశ్వరో నిరుచ్యతే । ఈశ్వరస్య ఫలాసఙ్గాభావాత్ కర్తృత్వాభిమానాభావాచ్చ కర్యాసమ్బన్ధవత్ ఈశ్వరాత్ అన్యస్యాపి తదుభయాభావః ధర్మాద్యసమ్బన్ధే కారణమ్ , ఇత్యాహ-

అతోఽన్యస్యేతి ।

యది కర్మసు కర్తృత్వాభిమానో వా కస్యచిత్ కర్మఫలసఙ్గో వా స్యాత్ , తత్రాహ -

అన్యథేతి

॥ ౯ ॥