ಶ್ರೀಮದ್ಭಗವದ್ಗೀತಾಭಾಷ್ಯಮ್
ನವಮೋಽಧ್ಯಾಯಃ
ಪೂರ್ವಪೃಷ್ಠಮ್      ಉತ್ತರಪೃಷ್ಠಮ್
ಆನಂದಗಿರಿಟೀಕಾ (ಗೀತಾಭಾಷ್ಯ)
 
ಅವಜಾನಂತಿ ಮಾಂ ಮೂಢಾ ಮಾನುಷೀಂ ತನುಮಾಶ್ರಿತಮ್ ।
ಪರಂ ಭಾವಮಜಾನಂತೋ ಮಮ ಭೂತಮಹೇಶ್ವರಮ್ ॥ ೧೧ ॥
ಅವಜಾನಂತಿ ಅವಜ್ಞಾಂ ಪರಿಭವಂ ಕುರ್ವಂತಿ ಮಾಂ ಮೂಢಾಃ ಅವಿವೇಕಿನಃ ಮಾನುಷೀಂ ಮನುಷ್ಯಸಂಬಂಧಿನೀಂ ತನುಂ ದೇಹಮ್ ಆಶ್ರಿತಮ್ , ಮನುಷ್ಯದೇಹೇನ ವ್ಯವಹರಂತಮಿತ್ಯೇತತ್ , ಪರಂ ಪ್ರಕೃಷ್ಟಂ ಭಾವಂ ಪರಮಾತ್ಮತತ್ತ್ವಮ್ ಆಕಾಶಕಲ್ಪಮ್ ಆಕಾಶಾದಪಿ ಅಂತರತಮಮ್ ಅಜಾನಂತೋ ಮಮ ಭೂತಮಹೇಶ್ವರಂ ಸರ್ವಭೂತಾನಾಂ ಮಹಾಂತಮ್ ಈಶ್ವರಂ ಸ್ವಾತ್ಮಾನಮ್ । ತತಶ್ಚ ತಸ್ಯ ಮಮ ಅವಜ್ಞಾನಭಾವನೇನ ಆಹತಾಃ ತೇ ವರಾಕಾಃ ॥ ೧೧ ॥
ಅವಜಾನಂತಿ ಮಾಂ ಮೂಢಾ ಮಾನುಷೀಂ ತನುಮಾಶ್ರಿತಮ್ ।
ಪರಂ ಭಾವಮಜಾನಂತೋ ಮಮ ಭೂತಮಹೇಶ್ವರಮ್ ॥ ೧೧ ॥
ಅವಜಾನಂತಿ ಅವಜ್ಞಾಂ ಪರಿಭವಂ ಕುರ್ವಂತಿ ಮಾಂ ಮೂಢಾಃ ಅವಿವೇಕಿನಃ ಮಾನುಷೀಂ ಮನುಷ್ಯಸಂಬಂಧಿನೀಂ ತನುಂ ದೇಹಮ್ ಆಶ್ರಿತಮ್ , ಮನುಷ್ಯದೇಹೇನ ವ್ಯವಹರಂತಮಿತ್ಯೇತತ್ , ಪರಂ ಪ್ರಕೃಷ್ಟಂ ಭಾವಂ ಪರಮಾತ್ಮತತ್ತ್ವಮ್ ಆಕಾಶಕಲ್ಪಮ್ ಆಕಾಶಾದಪಿ ಅಂತರತಮಮ್ ಅಜಾನಂತೋ ಮಮ ಭೂತಮಹೇಶ್ವರಂ ಸರ್ವಭೂತಾನಾಂ ಮಹಾಂತಮ್ ಈಶ್ವರಂ ಸ್ವಾತ್ಮಾನಮ್ । ತತಶ್ಚ ತಸ್ಯ ಮಮ ಅವಜ್ಞಾನಭಾವನೇನ ಆಹತಾಃ ತೇ ವರಾಕಾಃ ॥ ೧೧ ॥

ವಿಪರ್ಯಸ್ತಬುದ್ಧಿತ್ವಂ ಭಗವದವಜ್ಞಾಯಾಂ ಕಾರಣಮ್ , ಇತ್ಯಾಹ -

ಮೂಢಾ ಇತಿ ।

ಭಗವತೋ ಮನುಷ್ಯದೇಹಸಂಬಂಧಾತ್ ತಸ್ಮಿನ್ ವಿಪರ್ಯಾಸಃ ಸಂಭವತಿ, ಇತ್ಯಾಹ -

ಮಾನುಷೀಮಿತಿ ।

ಅಸ್ಮದಾದಿವತ್ ದೇಹತಾದಾತ್ಮ್ಯಾಭಿಮಾನಂ ಭಗವತೋ ವ್ಯಾವರ್ತಯತಿ -

ಮನುಷ್ಯೇತಿ ।

ಭಗವಂತಮ್ ಅವಜಾನತಾಮ್ ಅವಿವೇಕಮೂಲಾಜ್ಞಾನಂ ಹೇತುಮಾಹ -

ಪರಮಿತಿ ।

ಈಶ್ವರಾವಜ್ಞಾನಾತ್ ಕಿಂ ಭವತಿ ? ಇತ್ಯಪೇಕ್ಷಾಯಾಂ ತದವಜ್ಞಾನಪ್ರತಿಬದ್ಧಬುದ್ಧಯಃ ಶೋಚ್ಯಾ ಭವಂತಿ, ಇತ್ಯಾಹ -

ತತಶ್ಚೇತಿ ।

ಭಗವದಜ್ಞಾನಾದೇವ ಹೇತೋಃ ಅವಜಾನಂತಃ, ತೇ - ಜಂತವಃ, ವರಾಕಾಃ - ಶೋಚ್ಯಾಃ, ಸರ್ವಪುರುಷಾರ್ಥಬಾಹ್ಯಾಃ ಸ್ಯುಃ ಇತಿ ಸಂಬಂಧಃ ।

ತತ್ರ ಹೇತುಂ ಸೂಚಯತಿ -

ತಸ್ಯೇತಿ ।

ಪ್ರಕೃತಸ್ಯ ಭಗವತಃ ಅವಜ್ಞಾನಮ್ ಅನಾದರಣಂ ನಿಂದನಂ ವಾ, ತಸ್ಯ ಭಾವನಂ ಪೌನಃಪುನ್ಯಮ್ , ತೇನ ಆಹತಾಃ ತಜ್ಜನಿತದುರಿತಪ್ರಭಾವಾತ್ ಪ್ರತಿಬದ್ಧಬುದ್ಧಯಃ ಇತ್ಯರ್ಥಃ

॥ ೧೧ ॥