విపర్యస్తబుద్ధిత్వం భగవదవజ్ఞాయాం కారణమ్ , ఇత్యాహ -
మూఢా ఇతి ।
భగవతో మనుష్యదేహసమ్బన్ధాత్ తస్మిన్ విపర్యాసః సమ్భవతి, ఇత్యాహ -
మానుషీమితి ।
అస్మదాదివత్ దేహతాదాత్మ్యాభిమానం భగవతో వ్యావర్తయతి -
మనుష్యేతి ।
భగవన్తమ్ అవజానతామ్ అవివేకమూలాజ్ఞానం హేతుమాహ -
పరమితి ।
ఈశ్వరావజ్ఞానాత్ కిం భవతి ? ఇత్యపేక్షాయాం తదవజ్ఞానప్రతిబద్ధబుద్ధయః శోచ్యా భవన్తి, ఇత్యాహ -
తతశ్చేతి ।
భగవదజ్ఞానాదేవ హేతోః అవజానన్తః, తే - జన్తవః, వరాకాః - శోచ్యాః, సర్వపురుషార్థబాహ్యాః స్యుః ఇతి సమ్బన్ధః ।
తత్ర హేతుం సూచయతి -
తస్యేతి ।
ప్రకృతస్య భగవతః అవజ్ఞానమ్ అనాదరణం నిన్దనం వా, తస్య భావనం పౌనఃపున్యమ్ , తేన ఆహతాః తజ్జనితదురితప్రభావాత్ ప్రతిబద్ధబుద్ధయః ఇత్యర్థః
॥ ౧౧ ॥